TAMEDYAZT (SIWEL) — Ayen yessefraḥen d akken aṭas n yilemẓiyen i yefkan azal i wawal d tira n tutlayt-nsen, d ayen i yeğğan Taqbaylit, tettaẓ γer zdat, tettnerni, tettaf amkan-is gar tutlayin-niḍen. Dγa deg ussan yezrin i d-yessufeγ umedyaz Salim Benxlifa ammud-ines amezwaru n yisefra iwemi yefka azwel ‘’Ulamek‘’.
Salim Benxlifa, d mmi-s temnaḍt n Ferɛun, taddart n Yicekaben, lɛerc n Yimellaḥen, seg-mi yella d amecṭuḥ iḥemmel taẓuri d yidles, yegma-d deg umussu adelsan. Yella d aɛeggal deg tidukla tadelsant n Lbacir Amellaḥ. Yura ayen din n yimagraden deg uγmis n yimaziγen. yerra-d γer tutlayt taqbaylit aṭas n yeḍrisen, am wid n Kateb Yasin, Niẓar Qebbani, d wiyaḍ.
Rnu γer waya Salim d amedyaz ifazen, yessefraw γef tjaddit, tamurt, tayri d waṭas-niḍen n tlufa, yal asefru s tedyant-is. Yekki deg xilla n temliliyin d tfaskiwin i d-yettilin yal aseggas deg tmurt n Yiqbayliyen γef tmedyazt, ama deg udrar n fad, aqbu, tizi wezzu, bgayet d wanda-niḍen, u d win yewwin aṭas n warrazen, d yigerdasen n usebγes.
I usmekti, ammud-agi ‘’Ulamek’’, d win iwemi iga tazwert umedyaz-aselmad n temnaḍt n Ferɛun mass T.Qasa. D adlis ara d tafem yettnuzu deg kra n tnedlisin n temdint n Bgayet. Afud igerrzen i kra n wid d tid iqedcen γef Teqbaylit, i wakken ad tidir.
Akli Muhubi
SIWEL 020302 JUN 17 UTC