IDLES-NWEN ARUT , IDLES-NWEN KAN

TAMURT TAQVAYLIT (SIWEL) — Ɣer yal agdud i yal tallit,  di yal amkan di ddunit , d-idles i d-lemri n-umteddu-ines . Kra n waɣref yegan azal i usekkud-ines, yuffan isufar s wacu ara iqazem zzman, s wacu ara yensex isem-is deg adlis n taɣlalt,  isbedd timadit-ines ɣef yidles-ines.  Ma yella ass-a  tamurt n Marikan( USA)  tettuneḥsab d tanezmart tamezwarut  deg umaḍal, aya ur d yelli -ara s ugacur. Uqbel ad tesken ljehd n iɣallen-is,  tesneɛted di tazwara ifadden n yidles-ines.

S tawil kan n-isura id ttefɣen seg istudyuten n Hollywood, tamurt-agi tressa asekkud-ines deg iqerra n imelyunen n yemdanen ( targit tamarikanit) . Ass-a mi ara d yilli wawal ɣef sinima, qrib ala isura id ffɣen di tmurt-agi i-imucaɛan. Ulac win ur nessin ara ismawen n-imsufaɣ, neɣ isegbaren( acteurs) n  tikabiyin n sinima n tmurt-agi. Annect-a meṛṛa d-amedya n tzmert yekseb yidles deg usnarni  n yiman, n tmagit, n inekiw n yal aɣraf.   Tedrat-tt d yidles am akal:  swit ad yefk lɣella, eǧǧ-t ad yuɣal d lbur.

Am yal agdud di ddunit, agdud aqbayli akken ad yesɛu amkan gar leǧnas, ad yenǧer abrid ɣer yimal-ines, ilaq ad yesefti idles-ines. Ma ifat idles -nneɣ yefka iẓuran  di ṛṛeḥba tagraɣlant , azgan umecwar ɣer timument nneɣ , ad tilli tettwazger. Yiwet n tezlit deg iseggasen n 70( a baba inuba) tekkes miḥyaf  ɣef taqbaylit,  tnejer-as id iberdan hrawen ɣer  talsawit. Ayen id tewwi tizlit-agi i waɣref aqbayli yugar merra tikliwin akked timesbaniyin id  yellan seg useggas 1980 ɣer ass-a. Ɣef aya d-lawan  a  negzu: ma yerfed ugdud idles-ines, d -idles-nni ara s id yegen amkan gar yitran.

Xudi, aya di tmeṭṭi-nneɣ ur d yelli ara. Ɣer  ass-a n wusan ur neṣsawed ara  a nesɛu tilbizyuwat, imeṭṭafen, tisɣunin, iɣmisen , amzegun , sinima ara yillin d lemri n yiman-nneɣ, ara yillin d taɣect  n lebɣi-nneɣ. At wadrim iqbayliyen zzin s weɛrur i yidles-nsen. Yiwen ur t yečči wul-is as yinni ad seṛfeɣ kra  deg isenfaren icudden ɣer yidles( aɣmis, radyu, isura, ixxamen umezgun….) , xudi ula d-aḥric n yedles d-amur ameqqran deg tadamsa( tamurt n masser tesuffuɣ-d azal n 30 ɣer 40 isura deg useggas, deg aɛccen acḥal n tawaculin gar izefanan, imyura, wid yettarun isnaryuten, ikameramaniyen,….) .

Tizwirt-nneɣ, lemmer id-ak-terbiḥ ay ul  d-asllali n wallalen  n taywalt( radyu, tilibzyun, iɣmisen) . Win ikesben allalen-agi yega asurif meqran akken taskana –ines ad taff abrid ɣer waɣref. Ifadden n yal amenuɣ d tawwil n uṣṣiwed n tikta.  Mebɣir tawilat-agi tiɣri akken ibɣu telqay neɣ tesɛa azal, d-awezɣi a telḥeq bab-is. Si tama nniḍen akken agdud ad yezdi ɣer yiman n yiman-is, ilaq asnulfu s wacu ara yezdi s lqedd( isura, ungalan, ticqufin umezgun n lɛali ara d yawwin arazen deg tfeskiwin tigraɣlanin) . Aya merra ur yelli-ara d- awezɣi fell-nneɣ, nezmer ma yella neges akken  ad nesken i yiman-nneɣ akked wiyaḍ d-acu nella sani  nteddu.

H@S
SIWEL 142330 JAN 21

Partager ceci...