Zemmen 30 n yiseggasen γef tmettant n ucennay Arezqi Rawes

MAKUDA  (SIWEL) — Atna zemmen 30 n yiseggasen γef tmettant n ucennay ilemẓi Arezqi Rawes, i yessedhan acḥal d iqvayliyen s tezlatin-is i yecna γef tayri tazedgant. Yecna, yessarem, maca teffeγ-as tirga mxalfa, tezzuγer-it lmut akken d aleqqaq γef tudert n 22 d aseggas.

Rawes d isem n unaẓur, ma d isem-is n tidet Arezqi Cebli. Ilul deg useggas n 1965, di taddart Agni Ḥemmic (Tala n weẓru), di Makuda. Tewwit tmijalt deg as n 29 n wayyur n tuver, aseggas 1987, deg yiwet n twaγit n uvrid netta d kraḍ n yimdukal-is, mi fγen i yiγrem n Tizi wezzu s tkerrust.

Yemmut deg tudert-is 22 n yiseggasen, Yerna yexḍev, mazal-as kan azal n wayyur ad yercel, ur yeddir i tmeγra-s, ur yeḥḍir i tesfift-is tis snat mi d-teffeγ, iruḥ akken d aleqqaq, ur yeṛwi tudert. Siwa netta i tesɛa yemma-s d awtem, ilul-d deffir kraḍ n teqcicin.

Tasfift-is tamenzut teffeγ-d deg useggas n 1986, ma d tis snat teffeγ-d seld tamettant-is, deg-sent yecna γef tayri s wayen yelhan d wayen dir, war akukru. Ur yeffir ara iḥulfan-is, d tmuγli-yes γef medden akken ma llan.

Γas akken d amecṭuḥ Rawes yecna deg aṭas n tudrin. Mi yella d anelmad deg uγervaz amenzu, imdukal-is inelmaden lhan-d d temsirin ma d netta icennu. Nutni ttaran lwelha ad lemden ugar, ma d netta yerra lwelha-s γer ccna, acku izdeγ ul-is. D aya i t-yewwin ad yeḍfer avrid n wid tizwaren deg unnar-agi n war tilisa.

Ass-a γas akken yemmut, maca mazal aṭas n yilemẓiyen i yessemḥasen i tezlatin-is. Llan wid i tent-icennun deg tmeγriwin d yivarazen. Akken daγ i s-uγalent tejmilin deg iseggasen yezrin. Yeqqar-as ucennay deg yiwet n tezlit, i wumi yefka azwel  » Lḥub n temẓi »

Ziɣ d temẓi-w kan i ḍegreɣ
A lḥub asmi aken i k-vdiɣ
Am usafu raqqeɣ ṭaẓeɣ
Di snat n lğihat rɣiɣ
Ass-a mi ɣliɣ ftutseɣ
Tenna-k d wayeḍ ay vɣiɣ


Akli Muhubi
SIWEL 311017 Oct 17 UTC

Partager ceci...

Laisser un commentaire