Sélectionner une page

IFIΓA (SIWEL) — Aṭas n yicennayen iqvuren i d-yefkan i tezlit taqvaylit, i tewwi lmut deg iseggasen-a ineggura, gar-asen Muḥemd Racid, Xelwi Lwennas, Ḥmed Ḥammu, Meẓyan Racid, d wiyaḍ yal wa s yisem-is d wazal-is. Yiwen deg-sen d Muḥend Uzeggan. Tessaweḍ tmijalt-is deg useggas n 2015 γef teγzi n 71 d aseggas deg tudert-is.

Muḥend Uzeggan, d mmi-s n taddart Ifiγa. Ilul deg useggas n 1944. D amedyaz-amẓawan, wid tiḥemmlen ssawalen-as Dda Muḥ. Yecna γef waṭas n temsal d yisental. Yettwasen nezzeh deg yiseggasen n 1960 γer 1970.

Deg akud n tegrawla ur yeffir ara γas teqseḥ fell-as tallit, yettwasen s yisem “Alain” yerra iman-is zun d aṛumi deg yiwet yessen tutlayt tafransist, deg tayeḍ i wakken ur ttfaqen ara yiserdasen. Yezga yettawi isallen akked d tevratin gar yimeγnasen i yellan deg inig.

Muḥend Uzeggan, d yiwet gar waṭas n tgejda n tezlit taqvaylit, yekcem annar n uẓawan deg tazwara n yiseggasen n 1960, yettwasen nezzeh s tezlit: “Ttγenniγ Si Muḥend Umḥend”, i d-yessuffeγ deg useggas n 1963, anda i d-yesmekta yerna yerra tajmilt i umedyaz n teqvaylit i yefnan deg useggas 1905.

Yessekles ddeqs n tezlatin, yessuffeγ-iten-id d yiḍevsiyen anda yecna γef tayri, inig, timetti, tayemmatt d yisental-nniḍen. Ixuleḍ xilla n yicennayen n tsuta-yis : ama d Kamal Ḥemmadi, Ḥasen Ʃebbasi, Ḥnifa, Talev Raveḥ, Ğamila, Akli Yeḥyaten, d wiyaḍ yal yiwen s yisem-is.

Γas akken ur d-yenjir ara avrid aγezfan deg unnar n ccna, maca d win yesɛan amkan d ageɛmir gar yinaẓuren imeqranen n tezlit taqvaylit. Yerna yettruẓ aqerruy-is deg unnar-a, ur yeḍfir ara ayen i sehlen. Deg akud-nni d netta i d-yesnulfuyen aẓawan, yettaru tamedyezt, ur yettkil ara γef wiyaḍ.

Muḥend Uzeggan tessaweḍ tmijalt-is deg ass n 18 ctember 2015, deg tmurt n lezzayer, sebba n yiwen n waṭan i yeqqazen deg-s irennu, acḥal wakud-aya, γef tudert n 71 n yiseggasen. Yettwamḍel deg taddart-is, zdat yimawlan-is, deg akal n lejdud-is, akken i yessarem, deg Ifiγa taddart i ḥemmel nnig kra yellan.

Akli Muhubi
SIWEL 130723 Oct 17 UTC

Partager ceci...