Taqvaylit

Brahimi Lxeyyer, amedyaz-amnadi i yefkan azal i uḥraz n tjaddit

AT SMAƩEL (SIWEL) — Γas ma llan kra ur d-cligen ara deg tnekkit-nsen neγ yewwiten wassif d asawen, maca aṭas n yergazen d ttlawin refden imru ad ḥerzen ayen i d-yeqqimen seg tγerma n yijudda-nsen(t), gar-asen yella mas Brahimi Lxeyyer.

Ilul deg 16 yulyu aseggas 1961, di tmurt n Yiqvayliyen, tamnaḍt n At Smaɛel. Yella d aɛeggal deg tiddukla tadelsant Adrar n Fad, yekcem deg umaḍal n tsekla s tmedyazt-is yemgaraden. D aya i t-yeğğan ad inadi awalen iqvuren n tutlayt n tajddit, i wakken ad ten yesseqdec deg yisefra-s.

Lxeyyer yessefra γef waṭas n temsal. Yura γef tutlayt, tameṭṭut, tamurt, tayri, uguren n tmetti, tajaddit, yerra tijmilin, d wayen-nniḍen, rnu γer waya yettili deg ttiɛad-at idelsanen d yisaragen i d-suddusent tdukliwin tidelsanin di tmurt.

Yekki deg xilla n temzizlin d tfaskiwin n tmedyazt i d-yettilin di tmurt n Yeqvayliyen, md: At Smaɛel, Aqvu, Ferɛun, At Ziki, Timizar, d wanda-nniḍen; akken daγ i yewwi arraz amenzu n tfaska Kamal Buɛemmara deg tsedawit, deg useggas n 2009. Rnu γer waya ixeddem tafsart n yedlisen i yettwarun s teqvalit.

“Yal azamul yesɛa azal” d adlis amenzu n umedyaz Brahimi Lxeyyer. Yeffeγ-d deg useggas n 2010, s lmendad n tiddukla tadelsant “Adrar n Fad” n temnaḍt n At Smaɛel. Iga-s tazwert mas Zahir Meksem i yellan d aselmad deg ugezdu n tutlayt d yidles amaziγ, n tsedawit n Ʃebdereḥman Umira.

Leqdic-a d ammud n yizamulen n rreqem, n yiqnucen, n At Smaɛel, dγa deg-s Lxeyyer inuda γer temγarin d tlawin, i wakken ad yessekfel wa d yessegzi anamek-nsen. Adlis-a deg-s 61 n yiriten i d-yenna mas Sadeq Rebbaɛi i yellan deg akud-nni d aselway n tiddukla n Udrar n Fad.

Idlisen n mas Brahimi:
-Yal azamul yesɛa azal, (anadi) – 2010
-Tisit n udrar n fad, (ammud n tmedyezt) – 2015

Akli Muhubi
SIWEL 162000 Oct 17 UTC

Partager ceci...
Brahimi Lxeyyer, amedyaz-amnadi i yefkan azal i uḥraz n tjaddit
Click to comment

You must be logged in to post a comment Login

Leave a Reply

Haut