S teqvaylit

Ta d tiɣri n tmeṭṭut ger tulawin iwumi yerɣa wul ɣef tmurt n Yiqvayliyen

TIΓRI (SIWEL) — Ta d tiɣri n tmeṭṭut ger tulawin iwumi yerɣa wul ɣef tmurt n Yiqvayliyen. I yal Aqvayli, i yal Taqvaylit, yellan di tmurt neɣ di Fransa, iwakken ad nekki di tikliwin n 16 yivrir di Paris (ɣef zzuğ n tmeddit, si Bastille ɣer République) akked tikliwin ara d-yilin di tmurt n Yiqvayliyen ass n 20 yivrir.

Ilaq ad nili deg waṭas yid-neɣ, yid-nteɣ, iwakken tiɣri-nneɣ, asiwel-nneɣ, ad yaweḍ yal tasga deg umaḍal. Yal yiwen ilaq ad iẓer ass-a dakken nekni d aɣref, d aɣref am yiɣerfan merra n talsa ; nessutur timunent-nneɣ, nevɣa ula d nekni ad nesɛu awanek-nneɣ, ad nessali tameslayt-nneɣ ɣer wemḍiq unsiv, ad tili d tutlayt n tussna, d tin ara ɣ-yeldin tiwwura ɣer tlelli d tmusni.

Aqvayli, ass-a, yenna-d d ayen neɛya seg yimnekcamen izzayriyen. Aqvayli, ass-a, yevɣa ad yidir di tugdut, di tigduda taqvaylit, tamagdayt ara yevḍun ger tesreḍt d tsertit, ara igen tagada ger wergaz d tmeṭṭut, ara yerren agdud d agellid izemren ad iveddel wid i t-iḥekmen, d agdud ara iḥekkmen wid i t-iḥekkmen, ideg axeddam ad yesɛu izerfan-is, ad yesɛu awal-is, ideg yal yiwen ad yidir di tlelli, di tayri d leqder.

Anect-a ur yelli d tirga maca d tidet, ma neddukel afus deg ufus, argaz tameṭṭut, ad t-naweḍ. Iqvayliyen deg umezruy sseknen-d tazmert-nnsen deg umennuɣ-nnsen mgal imnekcamen, maca zgan ttnaɣen ɣef tlelli n wiyaḍ, ttun tilelli-nnsen. Acku ḥemmlen merra imdanen n umaḍal, tiwwura n wulawen-nnsen ldint i yal amdan. Yewweḍ-d wass deg waydeg ara nennaɣ ɣef tlelli d timunent-nneɣ. Asmi ara nili d aɣref yesɛan awanek-ines, nezmer ad nkemmel amennuɣ-nneɣ ɣef tlelli n talsa sumata acku yal amdan d gma-tneɣ.

Ihi, ad d-alseɣ tiɣri-inu seg wul i yal yiwen seg-wen, i yal yiwet seg-went, iwakken ad d-neffeɣ s iverdan, iwakken ad tejjuğğeg tefsut n useggas-a ɣef tmurt n Yiqvayliyen, ad tif tifsutin akk yezrin.

Ad d-neffeɣ iwakken ad nessuter TIMUNENT N TMURT N YIQVAYLIYEN

Ad tidir tmurt n Yiqvayliyen di tlelli d tmunent
Tajmilt i yimeɣrasen n tmurt n Yiqvayliyen

Noria
SIWEL 122002 Apr

Haut