(SIWEL) — Akken kan i nuli s afurgu azal deg 20 yid-nneɣ, ɣef 6 : 00 n tsebḥit neqlaε, ur tufid d acu i nedda, neffeɣ-d i temdint n Vgayet iqubel-aɣ-d udmar n yibulisen amezwaru (abarraj) , ḥebsen afurgu ideg i d-nedda ssuteren-as lekwaɣeḍ unehhar, ufan ur yesεa ara ttesriḥ neɣ turagt akken ad isikel, ladɣa din kan i as-nnan ad ten-yettbaε ɣer uxxam n yimsulta (la cmmissariat) , yerra-aɣ-d armi i d tamersiwt n Vgayet yeǧǧa-aɣ din, netta i kemmel iṭeffer imsulta. Ners-d nemslay, negzem-itt deg rray ad nkemmel abrid, ad nqabel taluft akken tebɣu tili, nedda-d d ufurgu i yettawin Vgayet –- Tizi uzzu, nessawel i mass aselway Buεziz, yenna-aɣ-d ddut-d ɣer Iεezzugen anda ara d-tafem afurgu ara ken-d-yawin ɣer Wat Zellal.
Akken newweḍ s axxam n yimsulta, iseqsiyen-nsen ala ɣef wayen i cudden ɣer umussu, seqsayen yiwen yiwen deg-nneɣ: “d acu i ken-d-iwwin? Anda i tetteddum ? neẓra d le MAK i d-iheggaw agraw….” Ṭṭfen ismawen-nneɣ, serḥen-aɣ-d, nettemsawal d yimdukal nniḍen, ula d nutni ḥeslen, yewwi-ten ufurgu i ten-d-yettrajin, yedda yid-sen kra ufan daɣen abaraj deg ubrid, imsulta sutren deg unehhar ad ten-yerr alma d amkan i ten-id-iddem. Ma d nekni deg 4 nekra afurgu seg Iεezugen ɣer Wat Zellal, ur tufiḍ d acu nedda nemuger-d yiwen ubaraj amzun d lkazirna i yellan din, teččur d tikerrusin n yimsultad yijardarmiyen, ḥbsen afurgu, yefka-asen unehhar lekwaɣeḍ, seqsan anida i yeteddu, yerra-asen ɣer Wat Zellal. Din din i as-nnan uɣal ulac abrid ɣer Wat Zellal , nbeddel abrid nteddu metwal Meqlaε iḥbes ufurgu ad ners tama n uxxam n yimsulta, swaswa din i d-jban fell-nneɣ amzun d nekni i ttεassan, wwin-aɣ daɣen i tikkilt nniḍen
Mi newweḍ ɣer uxxam n yimsulta freq-nneɣ, nuda-aɣ akk, yiwen ufan-as ɣer-s annay aqbayli, gren ɣer-s wten-tt, ad aɣ-d-ttmeslayen s teεrabt qqaren-aɣ-d: ”nekni d idzayriyen d imaziɣen, nerra-asen s teqbaylit :“nekni d imaziɣen d iqbayliyen” kra d awal ara ad d-inin s taεrabt ad asen-yuɣal wayeḍ s teqbaylit, muten seg lɣec, ččan times, ladɣa iεraben-nni yellan din, llan leqbayel ɣef wudemawen-nsen amzun setḥan deg-nneɣ, ulac win meḥsub i aɣ-d-yennan awal diri-t deg-sen, neqqim azal ahat saεa d uzgen neffeɣ-d nuɣal alma d ansa i d-nusa , ifuk wass.
SIWEL 021922 FEV 16