ADLES (SIWEL) — Yal aseggas mi i d-yelfa umenzu n yennayer, iqbayliyen am yigduden n tferka n ugafa, ttmagaren-t s tmeɣriwin d leqdicat idelsanen, tikliwin d wayen niḍen, deg umagrad n wass-a ad teɣrem ɣef usfuggel n Yennayer s lmendad n Tidukla Tadelsant n Taddart n Tewrirt di tɣiwant n Ukefadu.

 

Yella-d leqdic d amerkanti ilmend umaggar useggas amaynut n yimaziɣen d aseggas n tmazɣa. Akken uɣen tanumi Tiddukla Tadelsant n taddart n Tewrirt di tɣiwant n Ukefadu (lεerc At Mensur) yal aseggas sfuggulen amenzu n yennayer. Yuɣal d ansay di tdukla. Seg useggas 2009 ɣer tura dimma zgan deg usfuggel n yennayer.

Tikkelt-a 2967/2017, deg wass 12 di yennayer, anda yella-d wahil d ameẓẓyan ɣef 14h00 yella-d usarag ɣef usentel n « Dacu-t Yennayer » sɣur yiwen umaru, d amusnaw wagi d mass Racid Ulebsir anda iga-d yiwen usarag di yiwet n tzeqqa i wumi qqaren lğameε n taddart. Lɣaci yella s tuget imi ḥemmlen Dda Racid, daɣen tcuɣbiten temsalt n yennayer, ɣer taggara n usarag yekfa s uskasi yelhan imi llan kra n yisetqisyen icudden ɣer udabu d umecwar n tmaziɣt s umata , yerna imuded aznuzu n yidlisen i d-yessuffeɣ.

Deg Yiḍ-nni, Tiddukla n Tewrirt teswejded yiwen n wurar d abaḥan iwumi ssawalen (Urar adelsan). Rrnan-d ticemmuεin akken ad t-ceεlen i useggas amaynut 2967 wa at-mmagren s tumert d talwit n tudert.

Deg wass wis 13 di yennayer 2017 naɣ azekka-nni ahil d aɣezzfan d amerkanti , yella-d deg uɣerbaz amenzu n taddart , anda llan-t twaculin n taddart ussan-t-d s tuget akken ad cerken-t lferḥ n tmeɣra n yennayer. Daɣen anda yella wansay n ttesḍila i yigerdan imecṭaḥ sɣur yimɣaren n taddart. Leqdic ikemmel almi d taggara n wass. Yella cwiṭ umuddu n tgella taqburt i twaculin ad nebder lkarkura, tabazit, afettet , arkul , adɣes…

Imi twwed d 12h00 syina yewwḍed win ttrajun medden, seksu d uyaẓiḍ d ubisar hatan lɣaci deg ijerbiyen tetten s tegmat d taḍsa d tumert imi d lεada n leqbayel sdukklen tiɣenjawin. Daya id-iswi.

Tameddit n wass tekfa s ccna d tmedyazt anda yerza-d yiwen umedyaz ifazen, Mass Farid Merad. Ma deg uḥric n ccna yella ilemẓi n taddart Chafaâ Idir akked laradi yacine, atg.

Taddart n Tewrirt n Ukefadu tumert ass-a imi dduklen ɣer tmeɣra n yennayer. D ansay, d azamul , imi yennayer d taburt useggas n Yimaziɣen.

Abdous Ghilas
SIWEL 201854 JAN 17

Partager ceci...