ASMEKTI (SIWEL)) — Almend n umuli wis 61 n tlalit n uγewaγ aqbayli Meɛtub Lwennas d umuli wis 34 n tmettant Sliman Ʃazem, tidukla “Azday Adelsan n Weqqas”, tessud-sed yiwet n temlilit anda terra tajmilt i sin n yizumal i yefkan tudert-nsen γef tnekkit-nsen, ddut-d yid-neγ deg umagrad.

 

Agzul γef tudert n Dda Lwennas:
Meɛtub Lwennas d yiwen n unaẓur amḥadi ameqqran i d-fkan yiduran ğerğer. Ilul deg as n 24 deg ayyur n yennayer aseggas 1956 deg Mewrirt n Musa, deg At Dwala, agezdu n Tizi wezzu, deg tmurt n Yiqbayliyen. Yessufγed tasfift-is tamenzut deg 1978. deg tuber 1988 yettwat s xemsa teldun sγur yiğadarmiyen deg micli. Deg 1994 yettwaker i teγzi n 15 n wussan.
Yewwi ayen din n warrazen, yecna deg aṭas ntudrin, d tmura, almi d asmi yettwanγa deg Tala Bunan deg as amcum n 25 yulyu 1998.

Agzul γef tudert n Dda Sliman:
Sliman Ʃazem γef akken i d-nnan wid yecfan d wid yuran, ilul as n 19 deg ctember aseggas 1918 deg taddart Agni Yeɣran, i d-yezgan deg temnaḍt n Yiwaḍiyen deg tmurt n Yiqbayeliyen.
D amedyaz, d anaẓur n ageɛmir cna n teqbaylit, tizlit-is tamenzut yefka-as azwel “A muḥ a muḥ” I yexdem deg 1948 γef lγerba, yesɛedda lmeḥna d taberkant, ur yebiḥ deg akud-nni la fransa la lezzayer, ula d tizlatin-is ttwagedlent deg yimaṭafen d leswaq, yefna deg ass n 28 yennayer 1983 yemṭel di Mwasak – Moissac.

Deg temlilit:
Ahil n leqdic yebda lewhi n 11 s usenɛet n yiwen n usaru γef tudert n d umecwar n Dda Sliman Ʃazem, ma deg tmeddit γef 13h yella-d usarag n Tdukturt Linda Wattaḥ seg ugezdu n tutlayt d yidles n tmaziγt ntsedawit n Bgayet γef tudert d leqdic n Dda Lwennas, anda i d-tsegza xilla n temsal. Tella- daγen tmedyazt s yisefra i dyewwi umeγnas Ceɛban Murad d Tayri Farid.

Yekfa usarag n Tdukturt Linda Wattaḥ, tezzi-d nuba n umeγenas amaru Naṣer Meğdub i d-yewwin asarag s ccna γef Dda Sliman Ʃazem anda i d yesegza ula d netta aṭas n temsal γef bab n tezlit A Muḥ a Muḥ.

Tfuk tmlilt s s tezlatin i d-tewwi Nadiya Sairi “allah wakbar n Lwennas d lḥut d twekka n Sliman”.
Yella-d lγaci s tuget ladγa tulawin d temγarin, i yeddan d wahil, ccebḥent tazeqqa s sser n teqbaylit-nsent.

Akli Muhubi
SIWEL 311833 JAN 17

Partager ceci...