Sélectionner une page
ⴰⵏⴰⵠⴰⴷ  ⴰⵇⵠⴰⵢⵍⵉ  ⵓⵄⴺⵉⵍ
ANAVAD AQVAYLI UΣḌIL
GOUVERNEMENT PROVISOIRE KABYLE
PROVISIONAL GOVERNMENT OF KABYLIA
ANEΓLAF AMENZU
LE PREMIER MINISTRE

 

Ulac iswi aheggaṛ am leqdic ɣef tmurt-iw, Tamurt n Yiqvayliyen d umennuɣ i teslullit-is. S waṭṭas n userhu ad sfugleɣ asemmi-inu d Aneɣlaf amenzu n Unavad Aqvayli Uɛḍil, sɣur Mas Ferḥat At Sɛid (Ferhat Mehenni), Aselway-is.

Awalen ur ttqiddin ara iwakken ad snemreɣ i Mas Aselway laman i yi-mud i tikelt nniḍen, mi i yi-ssers d aneɣlaf amenzu n Unavad, deffir mi lliɣ, s-ddaw n iduba-ines, d agensas adiplumati n Tmurt n Yiqvayliyen di Fṛansa.

Ulama nesmekta-d timɣeṛ n umahil i yettṛaǧun Anavad id itteddun. D levɣi-w ad qedceɣ i Tmurt n Yiqvayliyen ad yi-d-isken avrid, igan-iw iwakken ad uklaleɣ amḍiq-agi ay ṭṭfeɣ. Ceṛheɣ aṭas daɣen ladɣa di tallit-a n lfal yelhan i la tettidir Tmurt-nneɣ.

Tallit-a tusa-d s users n Umaktay deg Ugraw n Leǧnas Yedduklen, d asurif agejdan di tira n temsalt taqvaylit di tesmektayt tagraɣlant. Tallit-a daɣen tella-d s usejhed n temṣukin n MAK-Anavad ama di Tmurt ama deg tmura n yinig. Cceḥnat d tizɣan ttfukkunt yal ass ugar, ǧǧant amḍiq i iwukked anemzal i timunent n Tmurt n Yiqvayliyen, d akken d avrid ayiwan n tufɣa seg uzaglu amharsan.

Anavad id itteddun ad yessenqes amahil asertan, ad yernu ugar n yigan d isenfaṛ ad yessedhun aɣṛef aqvayli d Tmurt-is ugar, ɣer uẓayer-ines n Awanek-aɣlan, d aẓayer iɣef yessefk ahat yesseḥviver. Anavad id itteddun ad igerrez Tamurt n Yiqvayliyen s tsuda d wallalen ad iḥudden, asurif s usurif, tilas n Uwanek Aqvayli n yimal.

S-ddaw n leɛnaya n Uselway Mas Ferḥat At Sɛid, nevda aciweṛ d wawal akked tiẓdarin tiqvayliyin (allaɣen uḥricen) iwakken ad nesved Anavad amaynut ad yeggenses yal tama n Tmurt. Tasertit tamatut ad yesselḥu unavad amaynut deg tasgagt-is, ad ttettwasekken, ad ttettwasegzu kra n wussan kan deffir n usveddi-s.

Ttaxmam-iw n leqdeṛ i Uneɣlaf amenzu yellan uqvel, yiwen seg vavaten i d-isnulfan MAK-Anavad, Mas Lhasen Uziyan (Lhacène Ziani), i tarvaɛt yellan deg Unavad-is ɣef umahil ay ssawḍen. D aɣan (lwaǧev) fell-aɣ ad nesfaydi seg-s, daɣen ad t-nesnerni.

Ay agdud Aqvayli ɣlayen, sya kra n wussan, anavad amaynt ad yeggal s wudem unṣiv, zdat-nwen, iwakken ad yeqdec fell-ak daɣen ɣef Tmurt-nneɣ Taqvaylit. Anavad amaynut yettkel ɣef uttekki-nwen d ufus ara as-d-muddem iwakken ad yaweḍ iswiyen-is, ad yesved isenfaṛen-is.

Tudert d ttimunent i Tmurt n Yiqvayliyen.

Paris ass n 17 si ṭuveṛ 2017

Mas Zidan At Vlefdel (Zidane Lafdal)

—30—

SIWEL 191939 OCT 17 UTC

Partager ceci...