TIZLIT (SIWEL) — Ulac tiγmert deg tmurt n Yiqbayliyen, ud nuruw anaẓur, amedya temnaḍt n Buzgan, deg ugedu n Tizi wezzu, i d-yefkan acennay Tariq Ʃebdat, i kecmen annar n cna n Teqbaylit akken d ilemẓi aleqqaq.
Tariq Ʃebdat d yiwen n yilemẓi, i refden anay n tezlit Taqbaylit, i ḥemmel aẓawan seg mi yella d agrud, yekkred s tuγac n Sliman Ʃazem, Meɛtub Lwennas, Lunis Ayt Mengelat, Yidir, d waṭas niḍen, ayen i di rennun tumert d akken d mmi-s n temnaḍt i d-yefkan anaẓur ameqqran Dda Mhenni Ʃemṛun bab n tezlit “Tettcekireḍ-iyi-d jeddi-k”.
Aḍebsi amenzu n Tariq, yeffeγed deg useggas n 2009 γer teẓrigin Star Plus n Bgayet, deg taggara n useggas n 2016 yessufeγed yiwen n leklip umi yefka azwel “Taqacuf”, anda i yeglem tasertit n udabu s usaḍuf amaynut n tedrimt. Akka tura yesujud amaynut, γef akken i d-yenna yezmer ad yeffeγ deg tefsut-agi.
Tariq d win icennun γef tmetti, tayri, iγeblan, tamurt, d waṭṭas n temsal. Iḥemmel daγen ad yef-k tamezzuγt i uẓawan n teqbaylit, ceɛbi, atrar, d win umaḍal i merra.
Yecna deg xilla n tamiwin am Bgayet d Tizi wezzu d temnaḍin niḍen. Yekka-d s taγect-is taleqqaqt tudrin d tsedawiyin, rnu γer way yecna deg tfaskiwin d temliliyin i d-yettili-n yal aseggas deg tmurt.
Deg tagara, Yusef Abğawi anaẓur ameqqran n uẓawan aqbayli, fella-s talwit, yerra tajmilt i yicennayen n teqbaylit sumata, ama d iqburen neγ wid i d-yettenkaren, dγa yeqqar deg yiwen n ubruy: …ur ntettu wid yeddren/ nḥemmliten merra s ljemla/ yak s teqbaylit i hedren/ nḥemmliten yiwen yiwen/ ad nzux s wayen nesɛa.
Akli Muhubi
SIWEL 211922 Feb 17