TAQVAYLIT, D ISEΓ D WAZAL

TAMURT TAQVAYLIT (SIWEL) — Ur as-ssawaleɣ ara i umdan-ayi « Aqvayli », acku yeεfes ɣef nnif-is, yefka d asfel tafenṭaẓit d yiseɣ as-d-ǧǧan imezwura i uεdaw akken ad yernu ad yerkeḍ fell-as ugar wayen iεeddan.

Win yugin ad yeḍfer abrid n yiẓuran, yettleqqim deg lmut n tudert n yidles-is, yettrebbi acengu i yiri-s ara yeglun s tarwa-s.

Anay Amaziɣ neɣ Aqvayli, i t-irefden d win i d-turew yemma-s s lqedd, i d-turew s yisuɣan i nsel s teqvaylit, i d-turew s lujaε d uyefki i yesεedda deg yimi-s d amezwaru seg tebbuct n yemma-s n tidet.

Amdan-a, amezruy ad t-yesfeḍ deg cfawat gar wid irennun azal i wagla-s, ad t-yeǧǧ d imneṭri gar waklan i wumi yettwakkes leqder. Amezruy, ad t-yuwet s teyita n tatut sdat win yebɣan ad yessalin Taqvaylit.

Taqvaylit, ur tettraju ara seg wid i wumi yeεreq lasel akken ad irfed isem-is neɣ ad yernu deg wazal-is; Taqvaylit, tettraju deg tarwa n leḥlal, wid i d-yugman seg tala n tmussni n yimezwura-nneɣ akken ad tzerεen i tsuta i d-iteddun, yes-s ad d-rebbin tarwa ara yeṭṭfen s yiseɣ agla-nsen.

[email protected]
SIWEL 191215 MAR 21