TAMEṬṬUT, D AJGU ALEMMAS I TEQVAYLIT

TAMURT TAQVAYLIT (SIWEL) — Tameṭṭut Taqvaylit, seg zik di tegnit n ddiq d leḥris yettvan-d umkan-is di tmetti, tiḥerci akked tidi s wacu i tettqaval acengu akken yeɣu yili d wansa yevɣu yusa-d; ma nevder-d Faḍma N Sumer iquvlen tamhersa tafransist s tfenṭazit d yiseɣ akken ad d-terr tilelli i tmurt, dayen yecvan aṭas n tlawin tiqvayliyin i yekkin ula d nutenti di ṭṭraḍ mgal acengu afransis, zdint lqedd akked yirgazen akken aberrani i d-ikecmen tamurt ad yeffeɣ.

Seg temhersa tafransist ar temhersa tazzayrit, am tmes i yekkren taggara-ayi di tmurt taqvaylit i d-yeglan nnig 150 yimdanen yemmuten d waṭas ɣ yixxamen i yeɣlin, rnu-as imɣan d yiɣersiwen i yerɣan.. Yir tagnit-ayi i d-yeɣlin ɣef tmurt Taqvaylit, tameṭṭut taqvaylit ur teṭṭif ara ifasen-is ɣur-s, tettqaval tilufa d yir tiswiεin deg wanar s yiseɣ i wakken ad ternu afud ɣer tama n urgaz.

Ma nefka-d amedya ɣef yiwet n tlemẓit n wazal, Wafiya; d tilemẓit mačči wass-ayi, tqeddec deg wanar acḥal aya yal mi ara as-d-tessiwel tegnit, dayen i nettwali ussan-ayi, seg mi i tendah tmes di tmurt Taqvaylit, nettat tevges s lqedd, iḍ d wass, yal ass tetteddu, tettazal gar rwaḥ d tuɣalin ɣer twaculin i yenṭṭerren deg tmes i yekkren ussan iεeddan.

Wafiya, tqeddec deg wanar akked usevtar-is n Facebook « Sans frontières » neɣ war tilisa. Aṭas i wumi i d-terra acmumeḥ i yimi, terra-d asirem i twaculin, tekkes-asen lweḥc, tefka-asen tamwansa, s leqdic-is zeddigen d lemεawna i d-yettasen di yal amkan deg tmurt Taqvaylit, tessawaḍ-itt i twaculin i yenṭerren. Γas akken iεdawen n tudert, vɣan ad as-gezmen avrid ɣef leqdic i txeddem anda kra wussan ɣer deffir serɣen-as amkan ideg i teggar lemεawna i d-yettasen i twaculin. D acu kan, ma tameṭṭut, d uzzal ulac anwa izemren ad as-yerr aḍar ɣer deffir.

Tilemeẓit-ayi, s wayen akk tqeddec terna-as leḥmala i tesεa ɣer teqvaylit, d tameɣnast n tidet, gar wayen txeddem deg wanar d wul-is i yeččuren d tayri ɣer Teqvaylit d tudert
. Tameṭṭut yecvan Wafiya, neẓra llant tiyeḍ di tmurt Taqvaylit, nessaram ad d-vinent ugar s leqdic yelhan i levni n tmurt Taqvaylit.

SIWEL 251600 AOU 21