TAJMILT – ASMEKTI – AMEZRUY

TAMURT TAQVAYLIT (SIWEL) — Muḥend Aεrav Bessaεud, gar wudmawen yettwassnen d yirgazen i d-teǧǧa tmurt taqvaylit. Ass yecvan ass-a 01 yennayer 2002 i yensa yiwen seg yitran n tmurt Taqvaylit. 

Muḥend Aεrav Bessaεud ldint-d wallen-is deg   yidurar n tmurt Taqvaylit di taddart n Aqewej deg Iwaḍiyen. Akken d ameẓyan iquvel tamhersa tafransasist s yiseɣ d levɣi. 

Akken meẓẓiy deg leεmer, yekcem ɣer umussu n PPA d ALN.  Deg useggas 1955, Krim Belqasem yessers-it d imḍebber n Lawilaya III. Deg useggas 1958 yekcem ɣer tmurt Lmurruk ad d-isekcem sslaḥ, yettwaṭṭef syin rran-t ɣer lḥevs. 

Asmi i tewwi Lezzayer timunent 1962, Muḥend aεrav Bessaεud yugi, mgal  adavu n Benbella d tervaεt-is i d-iruḥen seg Wejda. Din i d-sersen fell-as ad yettwaḥves   » Un Mandat d’arrêt »   deg useggas 1963. Asmi i yura adlis lawan-nni  » Heureux pour les martyrs qui n’ont rien vu. » i d-imeslay ɣef txidas udavu d  tmenɣiwin n yirgazen ama tin Ɛebban Remḍan d Ɛmiruc … 

Muḥend Aεrav Bessaεud yeffer deg taddart almi d asmi i yeffeɣ d ukavar n FFS ɣer udrar mgal adavu n Benbella deg useggas 1963. Asmi iwala teḥres teswiεt, yerwel ɣer tmurt Lmerruk syin yekcem ɣer tmurt n Fransa. 

Deg tmurt n Fransa, Bessaεud yessufeɣ-d adlis wis sin  » Le FFS espoir et trahison. » Anda i d-yewwet ɣef Muḥend Ulḥaǧ d lexdaε n Ḥusin Ayet Ḥmed. 

Deg useggas 1966, deg uxxam Tawes Ɛemruc, Bessaεud d tervaεt-is snulfan-d taddukla i wumi semman Agraw Amaziɣ « Académie Berbère »   din i yezraε tikti ɣef yidles amaziɣ s telqayt s yeɣmisen d tesɣunin i ttarun lawan-nni, ferqen-ten  i yimeɣnasen d yiqvayliyen.  ad tent-ɣren am uɣmis  » Imaziɣen ». Dayen i d-isefrurxen tafsut imaziɣen deg useggas 1980. Gar leqdic yexdem Ugraw Imaziɣen: 

  • Ussan d wayyuren s tmaziɣt
  • Isemawen n yimdanen s tmaziɣt
  • Taswast S tmaziɣt (calendrier amazigh)

Gar useggas 1976 d 1978, Bessaεud teǧhed tmeɣnest-is, dayen i yeǧǧan aṭas imeɣnasen i as-irewlen. Deg 22 mars 1978, adavu n tmurt Fransa yerra-t ɣer lḥevs ɣef wayen iqeddec d tmeɣnest-is,  dayen i yeǧǧan tiwwura n Ugraw Amaziɣ  ad ibelleε  tiwura-ines, kra yellan d lkaɣeḍ tesεa-t wwin-t. 06 wayyuren i d-yesεedda Bessaεud  di lḥevs, mi d-yeffeɣ deg leεṭil, yemlal-d Jacques Bénet i t-isrewlen ɣer tmurt n Lispan syin yekcem ɣer tmurt Legliz anda i d-yeɣli d tmeṭṭut taglizit yezwej yid-s ǧǧan-d aqcic semman-as Yuva. 

Muḥend Bessaεud, ɣas deg lɣerba i yella,  ul-is mazal iḥebbek ɣef teqvaylit d yidles amaziɣ. Asmi yekker yebɣa ad d-yekcem tamurt, tazwara ugin ad as-d-fken amsineg ( le passeport) almi i tεawnen imeɣnasen d ineɣmasen s wamek i d-yekcem ɣer tmurt Taqvaylit 1997 anda i d-yewwi aẓayer  n umjahed ameqqran ( Statut ancien combattant). 

Muḥend Aεrav Bessaεud, yezga fell-as waṭṭan, anda i yella deg sviṭar n Legliz « Saint Mary’s, din  i yewweḍ ɣer taggara n wussan-is ass 01 yennayer 2002, yettwamḍel deg taddart-is ideg ilul. Deffir-s, aṭas tezlatin n tmurt i d-yeǧǧa: Massinissa, Agujil, Nesla i yimaziɣen, Ay aseggaz ..d yisefra iεawden Malika Dumran  d Takfarinas anda i as-qqaren: Tenniḍ-iyi γileγ d ṣṣeḥ, Newwi-d tafat s wudem »  akked « Mi akken i d-fγeγ seg uxxam. »

Muḥend Aεrav Bessaεud ayen i d-nenna fell-as drus, ad yeqqqim gar tgejda timeqqranin i d-turew teqvaylit s lqedd d tfenṭazit. Isem-is ad t-ijerred umezruy s yiskkilen n wureɣ i tsuta ɣer tayeḍ.

Am@Sin
SIWEL 011850 JAN 21

Partager ceci...