Taqvaylit

Tadiwennit akked Umedyaz-anaẓur amḥadi Yasin At Wdiɛ

TADIWENNIT (SIWEL) — Yasin At Wdiɛ d yiwen n umedyaz n Teqbaylit, d mmi-s n taddart n saḥel deg At wizgan, yebda yessefraw deg useggas n 1999, i ḥemmel nezzeh leqdic n Muḥya, yerra tajmilt i uselway Ferḥat Mhenni s yiwet n tezlit. D mmi-s n teqbaylit taḥrurt, γef waya yuklal afus n talellt.

Siwel : Deg tazwara ini-d deg kra n yimeslayen anwa i d Yasin At Wdiɛ ?

Yasin At Wdiɛ : Nekkd d amedyaz aqbayli. D mmi-s n taddart n Saḥel, deg temnaḍt n Buzgan (At Wizgan), agezdu Tizi wezzu, deg tmurt n Yiqbayliyen.

Amek almi i d-tufiḍ iman-ik deg unnar-agi n tmedyezt ?

Aya-gi yell-ad, seg tuber 1999, amek i d-yella ur zriγ ara. Tisebbiwin ddeqs i-yellan, yiwet seg-sen-t d icenayen iqbayliyen imeqqranen yecban Dda Sliman Ʃazem, d Dda Crif  Xeddam.

Anwaten yimedyazen d yinaẓuren iqbayliyen i tḥemmleḍ nezzeh ?

Deg tmedyezt aṭas i yellan, maca Muḥya yezzuzen-iyi aṭas, ma deg ayen yerzan cna, d mass aselway « Ferḥat Mhenni ».

Terriḍ tajmilt i mass Ferḥat s yiwet n tezlit, amek i d-yella waya ?

Walaγ Tamurt n Yiqbayliyen γures kullec, ala aselway, dγa nniγ-as uqbel meqqar ad mteγ ad setɛerfeγ s wayla-w.

D acu d isenfaren i d-tettheyiḍ sya γer zdat ?

Akka tura mazal γer γur-i azal n 40 n yisefra,  ad ten-cegɛeγ, γer YouTube. Γuri daγen 07 n tizlatin, yiwet seg-sent d tin anda rriγ tajmilt-nni i mass aselway, u skud dreγ mazal lxir γer zdat.

Dacu i d-awal-ik i yilemẓiyen d tlemẓiyin n teqbaylit ?

Ad-asen iniγ ilaq ad myeḥmalen gar-asen, ad ḥemmlen idles-nsen, ad ḥemmlen Tamurt n Yiqbayliyen.

Awal n taggara s wacu ara tekfu tdiwennit

Afud igerzen i wid akk yettnaγen γef tnekkit di yal timura n umaḍal,  ladγa aγref-iw aqbayli i ḥemmleγ seg ul zedigen am-aman. Hata kra n ubruy seg yisefra-w, d tarzeft i yimeγriyen d tmeγriyin n siwel:

Ma fehmeγ d acu tennam

Zriɛa-nwen ad temγi

Ma lhan waman iy-as dram

Γas tḍul-d gar imγi

Ma d yir akal deg-i iy-as teẓẓam

D acu tenwam ad nini.

Yesteqsa-t Muhubi Akli

SIWEL 022207 May 17 UTC

 

Partager ceci...
Tadiwennit akked Umedyaz-anaẓur amḥadi Yasin At Wdiɛ
Click to comment

Commenter cette publication...

Haut