IDLES (SIWEL) — Tinekkit Taqbaylit tettwaselked s tezlit seg tallit n umnekcam aṛumi, truḥ-d akken γer usuter n tutlayt-nneγ i udabu azdayri deg yiseggasen n 1970, 1980, 1990 γer tefsut n 2000. Llan yicennayen ttwanγan (Meɛtub Lwennas), wiyaḍ ttwaḥebsen (Ferḥat Mhenni), wid yettwanfan (Sliman Ʃazem), u mazal aṭas refden anay n cna amḥaddi gar-asen Saɛid Kessas.

 

Ssaɛid Kessas d yiwen n umeγnas n taluft taqbaylit d tlelliyin n umeslay d yizerfan n tmeṭṭut. D anaẓur amḥaddi s uγanib atrar. Ilul deg as n 29 deg ayyur n wunbir aseggas 1959 deg taddart n At Xelfun, agezdu n Bumerdas deg tmurt n Yiqbayliyen.

D win iḥemmlen cna seg mi yella d agrud. Tasfift-ines tamezwarut teffeγed deg useggas 1992.
Yuγ-d tagitart-is tamenzut mi yewweḍ 13 iseggasen deg tudert-is. Yekkred s tezlatin n Ferḥat Mhenni iy-at yeğğan ad d-yeḍfer abrid n tezlit tamḥaddit ula d netta.

Yecna γef lḥif, taqbaylit, tamurt d wayen niḍen. Ugar tizlit Dda Saɛid yettili deg tikliwin n Yennayer d 20 yebrir akk d tejmilin i yettuγalen i Meɛtub Lwennas d Umeẓyan Mhenni d wiyaḍ. Zik send a d-yeffeγ tastaγt yella d axeddam deg tmurt n lezzayer deg yiγallen n usellek, yesɛedda aṭas n lmeḥna, u d win yettaken afus n tallelt i yimdanen. Yečur wul-is d lxir d bu wawal ziḍen,… Ma deg ussan i d-iteddun a d-yuγal s uḍebsi amaynut, imir-nni a d-nuγal s wugar n yisallen.

Ayen yecna Ssaɛid Kessas:
-D acu i nettnadi, 1992
-Cfiγ i was, 2000
-Los Sordos – Iɛeẓẓugen, 2013

A d-nesmektiγ wid yettun neγ wid ur neḥṣi belli tamnaḍt n Ssaɛid Kessas s yisem-is n tidet At Xelfun. Maca tasertit n tiɛurrebt i d-yewwi udabu s tallelt n buydedyen terra-tt d caɛbet el ɛamur. D acu kan ayagi ur yerri ara imezdaγ n temnaḍt-a n Teqbaylit d ayen niḍen. Imi imezdaγ-is ṭṭfen deg tutlayt d yidles-nsen anaṣli. Ur brin ara i ṭbel deg aman, ur bedilen ara iles i yiles-nsen.
Yef waya i d-rnan azal d yiseγ i uγref aqbayli, tajmilt-nsen ur tesɛi tilisa.

Akli Muhubi
SIWEL 231322 JAN 17

Partager ceci...