Qasa Taɛerqubt amedyaz n Teqbaylit seg taddart n Tefritin

TAMEDYAZT  (SIWEL) — Ulac taddart neγ tamnaḍt deg tmurt n Yiqbayliyen, ur nesɛa xerṣum yiwen n umedyaz, yerna tamedyazt teṭṭef adeg d ageɛmir deg tmetti, tuγ-d aẓar seg akud n unekcum n temharsa n yiterkiyen, neγ ahat send aya.

Qasa Taɛerqubt d yiwen ger xilla n yimedyazen i d-tefka Teqbaylit, d mmi-s n  taddart n Tefritin, i yeṭṭafaren taɣiwant n Ferɛun, lɛerc n At Xaṭeb, deg ussamar n tmurt taqvaylit.

Ugar tamedyazt,  Qasa d aselmad n tutlayt d yidles n yijudda n tmazɣa, deg yiwen uɣerbaz amenzu, deg temnaḍt anda yettidir. Seg-mi yella d abeztuḥ, iḥemmel tira, acku yekker-d deg yiwet n twacult n yinaẓuren, ahat d anecta i d-sebba-s imi yekcem amaḍal n tẓuri.

D win yekkin deg aṭas n temliliyin d tfaskiwin n tmedyazt i d-suddusent tdukliwin tidelsanin, ama d tin n udrar n fad, itri adelsan n uqbu, tin n lbacir amellaḥ, d tiyaḍ. Amedyaz Qasa Taɛerqubt, d win yessefrawen ɣef tayri, tinekkit, tilelli, tamurt, timetti, idles, d tlufa niḍen.

Deg tagara, amagrad ad yali s yiwen n ubruy, d tukkist seg  usefru n umedyaz, iwemi yefka azwel « Tiɣersi n Yilem »:

Ussan di lqaa ay ssan
Leqḍeɣ-ten-id d imṭṭuyac
Ggiɣ-as taduli d uḍan
I teksumt xebcen yimcac
Iles yetthuddu ikedran
Ma izad ukerfa i tirac.

Akli Muhubi
SIWEL 071722 Mar 17

Laisser un commentaire