MAKUDA (SIWEL) — Lwennas ḥemzi, d ilemẓi ilul deg useggas 1982 deg tɣiwant Makuda yeṭṭafaren agezdu n Tizi Wezzu, am netta am yilemẓiyen iqvayliyen, iεedda-d ɣef yiɣervazen n tiεurevt n tmurt tazzayrit alma anda i d-yeffeɣ s ugerdas n Ujenyur. D ilemẓi yeɣra, yemεen, yefhem, yessen tiktiwin-is ɣef wacu ivedd, iferreẓ s tmussni akken iwata gar tlufa ladɣa tidak n tsertit.
Adavu amhersan seg wakken iwala Lwennas Ḥemzi yeḥrec; s tin lbeṭṭal icelqef argaz deg temdint n Tizi Wezzu ass 06/09/2020 ɣef lewhi 14h. Yensa yiwen yiḍ deg uxxam n temsulta ( La commissariat), azekkuya ass 07/10/2020 sεdan-t ɣer uxxam n teɣdemt syin srewlen-t ɣef tmurt taqvaylit anda i t-rran deg lḥevs n Sidi Mḥemmed deg Lezzayer tamanaɣt imi sbuben-as ayen ur yexdim deg lbaṭṭel belli am wakken « d win iseddawen amussu aɣewwaɣ. »
Lwennas, yella d imḍebber n tuqqna n tama umalu deg umkan Racida Ider seg Furar 2018. iqeddec s talwit, werǧin yessawel i yimenɣi neɣ i truẓi. D argaz iḥemmlen tudert, iḥemmlen izerfen, d win yebɣan tilelli i uɣref n tmurt Taqvaylit.
Lwennas Ḥemzi mačči iman-is yella deg lḥevs, llan imeɣnasen i t-yecban, i yumnen s tikti n timunent n tmurt taqvaylit am Walid Nekkic, Kamal Bensaεd i yellan daɣen di lḥevs deg Lezzayer Tamanaɣt; rnu ɣur-s ameɣnas Ǧamal Azεim iɣef i yeḥkem udavu amesvaṭli s sin (02) yiseggasen d leḥevs yellan akka tura di Tizi Wezzu.
Adavu amhersan amesvaṭli ur yeḥvis ara kan dayi, mazal yettceyyiε-d i yimeɣnasen n timunent d imeɣnasen n umussu MAK ad εeddin ɣer uxxam n teɣdemt n Vgayet gar-asen yella: Riyaḍ Hemcac, Hirur Ǧamal, Buceεlal Zahir, Ɛebd Rezzaq Yassin, Uεissa Ɛebd Rezzaq, Ǧennadi Farid, Menṣuri Ǧamal, Lεerbi Yaḥyun akked Bussεid Leḥsen. Wiyi ad εeddin i wussan i d-iteddun 31/12/2020.
Tamhersa d lvaṭel ur ttɣama ur ttdumu ma aɣref icemmer ɣef yiɣallen-is akken ad yekkes lqid ɣef yiman-is, ad yennaɣ ɣef yizerfan-is d tlelli n tmurt-is. Aɣref aqvayli, yewwi-d fell-as ad iεqel iman-is s yiman-is, ad imuqqel azekka-ines s tiṭṭ n tfenṭazit d yiseɣ, ad yekker am yiwen umdan ad d-yekkes tamurt taqvaylit gar tuccar udavu amhersan.
Am@sin
SIWEL 290855 DEC 20