Hommage

Lmajid Adrar (Mağğa), acennay n yiseggasen n tmanyin, tessaweḍ tmijalt-is

AWEQQAS (SIWEL) — Yal mi ara d-yaweḍ yisali n tmettant n kra n unaẓur, nesḥissif, neqqar-as : « ah limer, … ». Tikelt-a tezzi-d γef yiwen n ucennay i d-yufraren deg unnar-a deg yiseggasen-nni n tmanyin, wagi d Lmajid Adrar i yettwasnen s yisem n  »Mağğa » deg temnaḍt n Uweqas.

Lmajid, d mmi-s n temnaḍt n Buxlifa, ilul deg useggas 1960, yedder temẓi-ines deg Uweqas. Seg-mi yella d amecṭuḥ iḥemmel aẓawan, d aya i t-yeğğan ad yeḍfer abrid n tezlit Taqbaylit s wudem azedgan.

D win yebdan am netta am yilemẓiyen Iqbayliyen yeffuden taẓuri deg akud-nni anda d lɛib ma yecna yiwen. Lmajid yerna-d aqejjir-nniḍen i tezlit Taqbaylit deg Sswaḥel, d acennay wis-sin i d-yessaẓergen tasfift seld Ʃezdin Berquq, imi d netta i d amenzu i yerẓan asalu i ccna s wudem unṣib deg temnaḍin-agi.

Lmajid yecna deg aṭas n tudrin n tmurt n yiqbayliyen, yekka-d mačči yiwet n tzeqqa, anda yecna ḥemmlen-t. Taγect-is tettekkes urfan, tettağğa amdan yettxemmim. Isental i d-yettawi mgaraden, yekkaten-id akk, yecna tayri, tameγra, yerra tajmilt i terbaɛt n yilmeẓyen n Yiqbayliyen (J.S.K), yecna γef lmeḥna, beṭṭu, timetti d wayen-nniḍen.

Γas akken siwa yiwet n tesfift i d-yeğğa, maca ṣṣut-is mazal ad yettbeɛziq deg allaγen n wid i ti-ḥemmlen akked twacult-is. Yerna γas akken yuḍen ur yebri ara i tmundult, yeṭṭef di lmizan, yessentaq adinan am zik.

Iḥemmel daγen ad yecnu tuγac n Meɛtub Lwennas, Ḥamiduc, Sliman Ʃazem, Ayt Mengellat, Ayt Meslayen, d waṭas-nniḍen.

Lmajid yeğğa-yaγ deg ass n umenzu n γuct n useggas-agi n 2017, γef tudert n 58 d aseggas, sebba n yiwen n waṭṭan i yeqqazen deg-s irennu. Sgunfu deg talwit a Mağğa.

Akli Muhubi
SIWEL 221110 Aug 17 UTC

Partager ceci...
Lmajid Adrar (Mağğa), acennay n yiseggasen n tmanyin, tessaweḍ tmijalt-is
Click to comment

You must be logged in to post a comment Login

Leave a Reply

Haut