Karim Tizuyar : awal γef unaẓur i yefkan azal i wawal d uẓawan n Teqbaylit

TIZLIT (SIWEL) – Mačči d yiwen neγ sin n yinaẓuren d yicennayen n Teqbaylit i d-yufraren, ladγa deg yiseggasen-nni n tmanyin. Yal yiwen deg-sen amek i yeɛreḍ ad yawi ayen yelhan i tutlayt d tmetti. Mi ara ad tessalem i kra n unaẓur din-din yettban anwa-t, acku yal yiwen yewwid aγanib d agla-s. Gar yinaẓuren-a yella Karim Tizuyar, yettwasen mliḥ deg tmetti Taqbaylit akked d tmura anda gten yiminigen iqbayliyen, ladγa wid n fransa.

Talalit-is:

Karim ilul deg ass n 02 deg ayyur n meγres, aseggas n 1963. D mmi-s n taddart Agni n Tazart, i d-yezgan deg temnaḍt n Leqser, agezdu n Bgayet, deg tmurt n Yiqbayliyen.

Ussan-is imenza di cna:

Asmi yessaweḍ 13 n yiseggasen deg tudert-is yella yessen ad yewwet adinan, u yesentaq-it akken iwata. Am netta am tugget n yicennayen n teqbaylit, d netta i d-yesnulfan tagiṭart-is tamezwarut s yifasen-is.

Karim deg terbaɛt « AGRAW »:

Iban-d i tikelt tamenzut deg terbaɛt ‘’Agraw‘’ deg tesfift n useggas n 1985, yufrar-d s tezlit ‘’Ay aḥdiq awi-tt‘’, d tiyaḍ i yexdem netta akked Buğemɛa Semɛuni, yerna d netta i yuraren amundul deg tesfift-a. Yelḥa-d deg terbaɛt ‘’Agraw‘’ azal n useggas d uzgen, ssin akin yal wa yewwi abrid-is.

Anaẓur deg yinig:

Karim am netta am aṭas n yinaẓuren Iqbayliyen, yerf-d tabalizt, yezger ilel agrakal, yesqer di fransa. Dina i yemyusan netta d xilla n yicennayen, gar-asen Ḥamiduc d wacu i yeqdec deg aṭas n tmeγriwin d yibarazen, Sufyan, Mehdi Mzeγran, Racid Mesbaḥi, d waṭas-niḍen yal yiwen s yisem-is.

Abrid i yewwi seg 1987 γer 2010:

Deg useggas n 1987 i d-yessuffeγ tasfift-is tamenzut, deg-s ṭam n tezlatin, yal tizlit d tedyant i yeqnen γur-s, kra γef tayri, tiyaḍ γef zzher, d wayen-niḍen. Seg yimren ur yebri i cna, γas yettɛeṭṭil i wakken ad yessuffeγ, maca yettak rruḥ i leqdic-is, ixddem ayen yelhan.

Deg umecwar-is yecna γef tayri, timetti, yir zzher, tudert, tasertit, d yiγeblan. Yexdem mači yiwet neγ d snat n tmeγriwin d yibarazen, yecna deg aṭas n tudrin di tmurt, d xilla n tzeγwa deg yinig.

Karim Tizuyar, yewwid abrid d azedgan, ur yelli ara seg wid irefden iman-nsen, i wakken ad iban deg yiγmisen-nsen d tiliẓriwin yesderγilen allaγ. S kra n wanda yecna ḥemmlen-t wid iy-as yeslan. Yerna tseqsin fell-as, trağun amaynt-is.

Tisfifin d yiḍebsiyen i d-yessuffeγ:

-Ay agiṭar, 1987
-Attan truḥ, 1989
-Weḥdi-weḥdi, 1994
-Susṭa, 2002
-Ma nettargu, 2005
-Ljawi, 2010

Rnu γer waya, yessuffeγ-d yiwet n tesfift n liklip, deg tlemmast n yiseggasen 1990. Akken yekki s tezlit ‘’Attan a merwila‘’ deg yiwet n tesfift akked yicennayen-niḍen n tezlit Taqbaylit.
Deg yiseggasen-a inggura yewweḍeḍ yisali d akken yuḍen, nesaram ad yeḥlu, mazal tesra-yas tezlit Taqbaylit.
Deg taggara ad yali umagrad s yiwen n ubruy anda iy-as yeqqar unaẓur Karim:

Acḥal i yebɛd ubrid
I nelḥa yerna mazal
D lferḥ d lqerḥ neγ d lɛid
Nettruḥ akken i d-nettuγal
Yeɛreq ceddu yeddid
Asirem yeṭṭef-it lqid
Lfahem ibedd di tewḥid
Yettrağu ssber ad ilal.

Akli Muhubi
SIWEL 041722 Jul 17 UTC

Partager ceci...