« Iferɛunen » mgal igellilen Ikaṭalanen d Ikurdiyen yessuturen tilelli

TAKRUKIKT (SIWEL) — Ama d Angela Merkel ama d Emamanuel Macron ama d iselwayen n tmura-nniḍen bedden merra akkd Rajoy aselway n udabu n tmurt n Spenyul.

Iselwayen-a qeblen tiɣrit n ikaṭalanen ass n 01.10.2017 (ass n tefranit) sɣur tamsulta tasepunyulit. Adabu n Rajoy yugi ula ad yemmeslay akkd uselway n Ikaṭalaniyen, Puigdemont. Am win ara ad yini i weqcic ameẓẓyan: « Ini-iyi-d txedmeḍ tawaɣit i wakken ad k-kkseɣ tilelli-inek ».

Acuɣer Icuṭiyen zemren ad vuṭin ma yella ad ffɣen si tmurt n Legliz neɣ ad qqimen deg-s. Annect-a xedment daɣen Ikibakiyen di Kanada. Ma d Ikaṭalanen nnan ala? Adabu n tmurt n Spenyul yenna d Tamenḍawt n tmurt-is i tugi annect-a.

Ẓert tura d acu i d tlauft-a. Am win ara ad yini i tmeṭṭut-is (neɣ i wegaz-is) yessefk ad teqqimeḍ yid-i alam tenger tmeddurt, am triḍ, ama ur tṛiḍ ara. Annect-a daɣen yeḍra d Ikurdiyen.
Peshmerga (Pecmirga), am yergazen am tlawin nnuɣen mgal awanek ineslem di tmurt n Lɛiraq, wwin-d tilelli akk d talwit i tmuran n Lurup, i Markan akk d tmura-nniḍen. Tura ttwazerrgen ! Am waṭas n tikwal deg umezruy-nsen.
Ikurdiyen zzin-asen-d iwaɣzniwen si yal tilist.

D acu kan ur yessefk ara ad yettu yiwen imenɣi yettilin gar Ikurdiyen s yiman-nsen. Annect-a ikref-asen ifadden. War tadukli di tegnit am tin n wassa ur zemmren ara ad ssiwḍen ɣer Uzarug-nsen.
Ula d Ikaṭalanen ɣur-sen aɣbel i d-yekka deg-sen; ur dduklen ara daɣen.

Taluft-a n Ikaṭalanen akk d Ikurdiyen tessken-d yiwet n taluft: Tadsimant (Timanit) drus iwakken ad yedder weɣref d ilelli. Amedya: Adabu asepenyul i yennan ad yekkes tadsimat i Ikaṭaliyen. Azarug mačči d ayen fessusen ad yaḍ weɣref ɣur-s.

Nekk ul-iw yenna-yi: Ama d Ikaṭalanen, ama d Ikurdiyen zemren ad ssiwḍen ɣer yiswi-nsen assa neɣ azekka. Am Ikaṭalanen am Ikurdiyen, amur ameqqran deg-sen yumen s yiman-is d iɣerfan illan. Ssɣarayen, xeddmen s tutlayin-nsen…

Akli Azwaw
SIWEL 241245 Oct 17 UTC

Laisser un commentaire