« Ggugmen yinzizen » d ungal amenzu n tlemẓit Meɛuci Nawal

TASEKLA (SIWEL) — Win ara wen yinin d akken tasekla taqbaylit ur tgemmu ara, atan yeskadeb fell-awen, init-as ma ur tẓareḍ acḥal d idlisen i d-tessufuɣ, ɣas yella lixsas maca telḥa-d amecwar, u mazal lxir ɣer zdat. Tajmilt ad tuɣal i yilmeẓyen d tlemeẓyin i yefkan azal i tira s tutlayt-nsen.

Deg ussan yezrin, i d-yeffeγ wungal amenzu n tlemẓit Meɛuci Nawal, γer tezrigin Tira di Bgayet. D adlis iwemi tefka azwel “Inzizen yeggugmen‘’.

Awal γef tmarut :
Nawal Meɛuci, d yell-is n temnaḍt n Udkar, tlul deg useggas 1991, akka tura d taselmdt n tutlayt taqbaylit deg yiwet n tsenawit. D tamedyazt i yekkin deg aṭas n temliliyin d tfaskiwin i d-yettilin yal aseggas deg tmurt n Yiqbayliyen, tufrar-d s warraz wis sin deg tfaska n tmedyezt i d-tessuddus yal aseggas tidukla Adrar n Fad, n ayt smaɛel, i yettuγalen yal aseggas d tajmilt i umussnaw aqbayli Dda Lmulud n At Mɛemmer. Akken daγ i tewwi arraz wis kraḍ n temsizzelt n tullisin Belɛid At Ʃli, deg teẓrigt n 2016-2017, i d-tettheggi tsebddit takanadit Tiregwa.
Akka tura Nawal Meɛuci, tettuneḥsab deg umḍiq wis kraḍ deg tlawin tiqbayliyin i d-yessaẓergen ungalen s teqbaylit, seld tanaggalt tamenzut “Linda Kudac s uzwel Aɛecciw n Tmes”, akked Kaysa Xalifi s wungal-is “Iḥulfan”.

Tagrayt :
Deg ara, tajmilt-nwen d tameqrant a kra n win neγ tin i yrefden amru-nsen iwakken ad sğuğgen taqbaylit-nsen yettwarekḍen acḥal d aseggas. Tanemmirt u afud igerrzen a Nawal, nsaram d akken mazal ad yili leqdic γer zdat. Taqbaylit ad tzux s tmital-m.

Akli Muhubi
SIWEL 032045 SEP 17 UTC

Laisser un commentaire