TAMURT TAQVAYLIT (SIWEL) — War ma yehṭam wallaɣ, tufrared di tidmi tizlit n Matoub Lounes yecna deg iseggasen n tmanyin : « inni-asen aya afrux».
Deg tezlit-agi, Lounes yuzzen afrux akken ad iger tiɣri i yinaẓuren imḥadiyen n teqvaylit: Slimane Azem, Idir, Ait Mengullet, Ferhat Mhenni. Tuɣdat n-umsayer-nni d-adud ɣef taddart n yal yiwen seg-sen akken a sen-yesiwel wa a ten-yesteqsi ɣef yir liḥala wuɣur yecced ccna n teqvaylit.
Ass-a tazlit-agi werǧin tulli-tt takka, imi ɣef akka nettwali tagara-agi tizlit teqvaylit tulwa. Truḥ am akken tala i-swayen imɣi-teɛqer. Ulac ajdid, ulac acennay id yufraen akken ad yeṭṭef amkan id ǧǧen imezwura.
Si tmattent n Yidir akked Matoub Lounes , s tiǧǧîn n ccna sɣur n Mas Ferḥat Mhenni, Ala Lounis Ait Mengullet akked Zedek Mouloud id mazal ttnaḍḥen deg annar n ccna , ṭṭfen ṛṛuḥ i tizlit tamḥadit taqvaylit.
Xudi Icenayen-agi tura meqqer-it di leɛmer. Xas ad snulfun amaynut, mačči am zik-nni yal aseggas ad zuzren tisfift. Gar tisfifit akked tayed ttɛeddin rebɛa n-iseggasen ama si lǧiha n Lounis neɣ n Zedek Mouloud.
Aya si tama, si tama nniḍen ixculaf ara yeččaren ṛṛeḥva , ad awwin ajdid ur d nunten-ara. S tidet aṭas n yelmezyen id yettassen ɣer ccna, maca ṣḍa-nsen tikwal ur yezgir -ara ula d-amnar n taddart anda id illulen. Rnni ɣef aya aɛeṭṭel ɣef usnulfu sɣur icannayen id yegen isem iyi iman-sen am Ali Amrane, Les Abranis, Takfarians ….yesnerna i uḥulfu dakken amihi yenneḍ i ccna –nneɣ.
Deg isegasen n 70/80 mačči d-izli n tezlatin s wazal-nsen-t id yettmirin ɣer ṛṛeḥva n tzuri. Di lawan-nni, Sofiane, Malika Domrane, Amɣid, Ideflawen , isulas, Menad ….ttfen lmendad i waslal ( création). Yal aseggas yettillid umaynut akken tiɣri n teqvaylit d-awezɣi a yewwet gugam. Ccna aqvayli, di lawn-nni, yemmeɣ ɣef umaḍal , ulac anda ur yewwid. Ɣef aya ass-a wid yeṭṭafaren amtedu n tẓuri n teqvaylit wahmen ayen ggumen ad ifriren icanayen ara yillin d tamtilit n Yidir, Takfarinas, Lounis Ait Menguellet, Zedek Mouloud…
Tagnit teɛjel, ilaq ad ifriren ixulaf ara yilli d-azar iḍefren tara. Icanayen ar as yerran azal-is i tizlit teqvaylit akken werǧin ad teɣli seg teseddart wuɣur i tt-sewḍen imezwura. Abrid – amedya- tikelt-a yekked sɣur Stina ( umi tlaq tajmilt temeqrant) id yezuzuren yal-ass amaynut deg uẓeṭṭa. Ayen txeddem tanazurt-agi, yettawin teqvaylit di ṣṣura-s akked yixef-is , yuklal tisemɣert sɣur anavad aqvayli. Amer d lebɣi i lmendd n 20 Yibrir 2021 anaɣlaf n yidles aqvayli ad yerr lval-is, wa id iheggi tisemɣert tuklal Stina ɣef ayen yak id tewwi I teqvaylit ɣef leḥmala tezuzur i teqvaylit.
Sya ɣer ass-nni, tegnit teɛjel, ilaq diɣen icenayen-nneɣ ilmeẓyen ad gren di lval-nsen belli asafu ɣer gar ifassen-nsen id yeɣli akken times n tanfalit saɣen imenza d lmuḥal a tens. Ilaq a negzu awal n Matoub Lounes is yennan: “ ɣurwet wi berrun / i ṭṭbel deg waman/ yeknaf di lkanun/id tenid zzman/ ur cukkeɣ ad ccfun/wid it-yetavaɛn/ ɛecqen di lkemun/ id yettbexir wahran/inn-as ay afrux!” lemmer ad yezzi Lwennas d netta umi ara ad yalles ass-a.
H@S
SIWEL 142220 FEV 21