ADLES (SIWEL) — Ayt Meslayen d yiwen seg tgejda n cna aqbayli, i d-tefka temnaḍṭ n uqbil, deg tizi wezzu. D mmi-s n teqbaylit deg wacu i d-yugem ayen din n yicewwiqen. Yecna ɣef tumert, tayri, tamurt, d temsal nniḍen. Dɣa deg umagrad-a ɛerḍeɣ wwiɣed kra n wawal fella-s, ddut-d yid-nneɣ ad tissinem kra seg tudert n ucennay-nneɣ i yessulin awal n teqbaylit s tmedyazt-is yelhan mači d kra.

 

S yisem-is n lekwaɣeḍ Idir Benḥemmuc, i d-yusan ɣer tudert deg as n 03 deg unbir 1944 deg taddart n At Meslayen di temnaḍṭ n uqbil, agezdu n Tizi wezzu deg tmurt n Yiqbayliyen. Immal ɣer unnar n tẓuri asmi yella d anelmad deg uɣerbaz alemmas deg tama n wasif n alma (l’ex-Michelet). Yufrared s yisem n taddart-is Ayt Meslayen deg yiseggasen n 1970, deg tallit-nni teǧhed tezlit taqbaylit tamḥaddit s tuɣac n Ɛmer Kubi, Ferḥat d Yidir, Ɛetmani d waṭas-nniḍen, yal yiwen s wazal-is d yisem-is. Rẓan asalu d leqyud n udabu s yisefra d uẓawan-nsen, yerna deg tallit-nni teḥṛes nzzeh.

Ayt Meslayen icennu ɣef wuguren tettidir tmetti taqbaylit, tudert, tayri, yerra tijmilin, gar tezlatin-is ad bedreɣ: awi d-yerran zman-ik ay ajenwi, ay ataksi, a lmut, lexyal-im, d waṭas niḍen yal yiwet s usentel d tedyant-ines.

Yessaweḍ wass-is deg tegrest n 21 dujember deg useggas n 2000. Yedder 56 n yiseggasen, tewwi-t mmacaren d amecṭuḥ, yettwamḍel deg taddart deg i d-yeldi allen-is Ayt Meslayen.

Iqbayliyen d teqbayliyin ur tettun ara, yal aseggas truḥun ɣer uẓekka-s, smektayen-d argaz anaẓur i d-yefka udrar n Ǧerǧer ilelli Dɣa ilmend n umuli wis mraw sḍis (16) n tmettant-ines, imeɣnasen n umussu Afraniman n Tmurt n Yiqbayliyen i yekkaten ad yawi timunent rran tajmilt deg taddart-is, gar-asen Mas Buɛziz Ayt Cebbib, Haruni Ɛebdella, Ḥusin Ɛazem, Smaɛil At Umɣar d wiyaḍ i wumi ara d-iniɣ tanemmirt ɣef usmekti n yiwen seg tgejda n cna n teqbaylit. Ad fakkeɣ s yiwen n ubruy anda iyas yeqqar ucennay :

Wi bɣan ad yidir yemmet
Lfinga deg imi n-tebburt
Kul ma ad neggal neḥnet
Ṛuḥ ay aɛṛab ar tafsut, ṛuḥ

Akli Muhubi
SIWEL 241248 DEC 16

Laisser un commentaire