Awal γef Zahir, ilemẓi yuran ayen din isefra send ad yeγli d ameγras n Tefsut taberkant

TUĞĞA  (SIWEL) — Tafsut taberkant win tt-i-d-yemmektan ad yeḥzen, ad yer ttexmam-is γer deffir, acku aṭas n warrac i yettwanγan, aṭas n lbaṭel i yeḍran, mačči d yiwen i yettwaɛegben i lebda, d temsal-nniḍen ur nefri ar ass-a ur qrib ad frunt. Gar yimeγrasen n tefsut taqbaylit n 2001, yella ujeğğig yeγlin d aleqqaq i wumi qqaren Zahir Buremɛa (Bouremoua).

Zahir d yiwen n yilemẓi aqbayli i d-yusan γer tudert ass n 04 deg ayyur n γuct, aseggas n 1981. Ilul deg temnaḍt n Tuğğa, deg usammar n tmurt n Yiqbayliyen. Yettwasnen daγen s yisem n Ğamal deg taddart-is, akka iy-as sawalen.

Zahir d tẓuri:

Seg mi yella d amecṭuḥ iḥemmel ad isel i cna n Teqbaylit, d aya i t-yeğan ad yelmed tagiṭart. Kra n wakud kan yeqqel yetturar yes akken iwata. Yerna yettaru isefra. Γef akken i d-yenna yiwen n yilemẓi n taddart-is, Zahir yesɛa ayen din n yisefra, yeččur azmam, ata γer gma-s.

Zahir akked Tifinaγ:

Γef akken i d-nnan kra n yinagan i yellan deg akud-nni d imecṭaḥ γef Zahir, d akken yettaru agemmay s Tifinaγ akked yisekkilen n tlaṭinit, yezzuzur-it γef warrac, yeqqar-asen lemd-t tutlayt-nwen, issin-t tameslayt-nwen.

Timenγiwt-is:

Zahir am netta am yilemẓiyen n tmurt n Yiqbayliyen, ur yefki ara afus, ur yeffir ara deg uxxam, ur yessusem ara i ddel n udabu amharsan. Yemmuger s yidmaren-is tildunin.

Yettwanγa deg ass n 09 tuber 2002 γef lɛacra n yiḍ, deg Tuğğa, s teldunin n yimesbaṭliyen, deg lawan imi adabu aneḍlib yessawjad i tefranin n tγiwanin. Adabu iceggeɛ at wer taγlist (tamsulta), ad heggin u ad ɛassen liḥala. A dγa mi wwḍen s kra n wakud γer din, arrac n Tuğğa ur ssusmen ara. Bdan kkaten iwakken ad stixren imsultiyen yesḍen seg tγiwant-nsen, dγa dinna i yettwanγa yilemẓi Zahir Buremuɛa γef tudert n 21 iseggasen kan.

Zahir d ameγras wis 119 n tefsut taberkant. Asmi yettwamḍel deg ubraḥ n tγiwant d igiman n Yiqbayliyen i d-iruḥen. Ass-nni iberdan ttawin akk γer Tuğğa, ruḥen-d seg ukuẓ n tγemmar, ad ili-n i tikelt taneggarut γer yidis n umeγras.

D acu ara nexdem i uḥraz n cfawat n umeγras Zahir ?

Ass-a yewwi-d lḥal ad neɛreḍ akken nezmer neγ ma yella wamek ara d -nessuffeγ isefra-is d ammud ar ad d-yeqqimen d amezruy i lebda i tmetti Taqbaylit.
Yewwi-d lḥal ad tid-nettmekti yal aseggas. Yewwi-d daγen ad nkemmel amennuγ n warrac yeγlin deg tefsut. Uran TILELLI s yidamen-nsen, yerna ttwanγan d ileqqaqen.

Ass-a iban ubrid, d win kan ar ad d-yawin taγdemt i kra n wid yeγlin, yettwanγan, yenfan, γef taluft taqbaylit. Ihi a Tiqbayliyin a Yiqbayliyen ur yelli i terğa-m(t), ddaklem(t), nnaγem(t) γef Timunent, send ma ifut lḥal.

Akli Muhubi
SIWEL 161640 Aug 17 UTC

Laisser un commentaire