Awal γef ugrawliw ilelli Ḥmed Umeri i d-fkan idurar n Ğerğer

ASMEKTI (SIWEL) – Amer mačči d irgazen d tlwain i yettmagaren imharsanen s tebγest d yiseγ, d ili ass-a ulac tara, d ili Taqbaylit tenger zik. Tajmilt ad tuγal i tegrawliwin d yigrawliyen i d-fkan yidurar, tečča tmes acḥal d tikkal. Gar yirgazen i yennuγen γef tlelli di tmurt deg tallit-nni taqesḥant, yella Ḥmed Umeri, anwa ur nesli i tedyant-is.

Ḥmed Umeri s yisem-is n tidett Ḥmed Belɛidi, ilul deg ass n 25 deg ayyur n tuber deg useggas n 1911 deg At Bwaḍu, i d-yezgan deg yidurar n Ğerğer.

D agrawliw ameqqran n tlelli, yessergagi adabu amharsan n Fransa, iga deg-sen axessar, γef waya tawacult-is tettwaɛus, ttwakksen-as izerfan-is, acku ugin tasertirt n udabu aṛumi.

D yiwen urgaz aγewaγ. D bu tissas yeččuren d tabγest. Yeqqel d awezγi i yiserdasen n fransa. Tewwi-t Fransa d aserdas s yiγil. Kra n wakud kan irwel-d neγ yezzarti-d deg 1941, yexdem deg-sen afermas, almi d as deg-i yettwanγa deg 06 di fuṛar 1947, s leγḍer. Amer mačči s tallelt d tḥila n yifransisen d ili ur yettwanγi ara.

Ḥmed Umeri, yeḍfer abrid n igrawliyen imenza, am: Ccix Aḥeddad d Ccix Ameqqran d win n Lalla Faṭma n Sumer d Urezqi Lbacir. Γas akken deg tallit-nni llan yikabaren i d-ilulen, maca Ḥmed ur yekki deg-sen, ur yekcim deg-nsen, yewwi abrid ilelli, ur yebγi ad rayin fella-s ibeṛaniyen.

Send ad yemmet s kra n wakud, imal γer tsertit. Yella yebγa ad yekki deg uslal n tuddsa tuffirt, ara yeqedcen i uheggi n tegrawla deg akud-nni.

Aṭas n yinaẓuren n Teqbaylit iy-as yerran tajmilt gar-asen Mennad, Meɛtub Lwennas, Zedek Mulud, Lunis Ayt Mengellat d wiyaḍ, yal yiwen s yisem-is.

Ini-t i warraw-nwen γef yirgazen d ttlawin i yennuγen i uḥraz n tnekkit taqbaylit. Cfu-t γef wid yefkan iman-nsen d iseflan i wakken ad tidirem di tlelli. Isin-t amezruy n yijudda-nwen, d wid yewten ad snegren aẓar aqbayli.

Yewwi-d fell-aneγ ad neḍfer abrid n yimezwura-neγ, ad nawi-t tilelli i tmurt-neγ, ad ner tajmilt i yizumal-neγ. Ur ttrağut kra seg ucengu amharsan i yekkaten ad snegren agdud γef uẓar.

Sγur Aqcic Agugam
SIWEL 011340 Juil 17 UTC

Partager ceci...