Awal ɣef Luṣif, anaẓur n yiseggasen n 80

TIZLIT (SIWEL) – Mačči d taɣawsa i sehlen iwaken ad yemmeslay yiwen ɣef yicennayen n teqbaylit, ladɣa wid i d-yufraren deg yiseggasen n 1980. Acku deg aṭas deg-sen i refden anay n taɣect taqbaylit, deg akud anda yeṭṭuqet usuɣu ɣef tnekkit, idles, d yizerfan n umdan yettwagezren. Yal acennay yewwi-d amaynut i tezlit Taqbaylit, u yal yiwen s uɣanib-is, seg ceɛbi, γer fulklur, γer ṣṣenf atrar.

Luṣif d yiwen seg-sen, i yefkan azal i uḍris d uẓawan aqbayli. D mmi-s n taddart n Tgecrift (iflissen-tizi wezzu) deg tmurt n Yiqbayliyen, i yettidiren aṭas aya deg Fransa.

D win i d-yufraren deg yiseggasen n 1980. Iga abaraz-is, amenzu deg tzeqqa n Lulampiya anda yella ɣef usayez, ala netta s udinan-is, akked udrabki ameqqran Rabeḥ Xalfa.

Deg useggas n 1983, s lebγi d tebγest, yessufeɣ-d tasefift-is tamenzut, iwemi yefka azwel « ay afaktur », deg 1984 « ay arraw n Leqbayel », ma d tasfift « sava sava », teffeγ-d deg 1985 ne86, deg useggas n 1987 yessufeɣ-d tasfift-niḍen s uzwel « A Nura », aseggas n 1991 yessufeɣ-d « J.S.K », deg 1992 « taqcict n ɛecrin », dγa seg imir-nni, yeqqim almi d aseggas n 2006 anda i d-yuɣal s tesfift d taneggarut ar tura, din i yerra tajmilt i Dda Sliman Ɛazem, seg imiren ur nesli i umaynut fella-s.

Cna n Luṣif, yettak anzi ɣer win n Ḥamiduc, akked win n Rawes Arezqi, ama deg uẓawan, neγ d allalen-is, aṭas n yimdanen ur semgaraden ara gar-asen. Luṣif yecna s xila ɣef tayri, temẓi, tudert n yal ass, d wayen niḍen. Ger tezlatin-is, llan-t tigi: amek ar ad ḥluɣ, ay arraw n leqbayel, a yemma, axelxal, aya taksi, j.s.k, taqcict n 20, d tiyaḍ i yetthuzzun ulawen n wid iḥemmlen. Tasuta n wakud-nni tefka azal i cna, u fkan tallelt i unaẓur.

Ayen yessefraḥen ass-a, d akken mazal imdanen semḥasen i tezlatin-is, cennun-iten-t yilemẓiyen deg tmeγriwin. Yerna aṭas i yetteseqsin γef umaynut-is

Deg taggara, yeqqar-as unaẓur Luṣif, deg yiwet n tezlit i yexdem deg useggas n 1984 :

Ay arraw n Leqbayel
Si tizi alma d Bgayet
Ili-t d arraw n laṣel
S truggza ala nmet
Ma llan wigad iɣi kerhen
Ilaq gar-aneɣ ad tenkes-t
Yerna nɛemed

Akli Muhubi
SIWEL 232032 Apr 17 UTC

Laisser un commentaire