TAMEDYEZT (SIWEL) – Mači d yiwen neγ d sin n yimedyazen d yinaẓuren i yerran tajmilt i mas Ferḥat Mhenni, ladγa γef umennuγ-is i d-yenjer aṭas n yiseggasen aya, neγ γef taluft taqbaylit s umata. Gar yimedyazen n tsuta n wass-a yella yilemẓi Nurdin Kebbic, i yuran aḍris-a deg ass n 13 n wayyu n γuct 2015, anda i s-yeqqar:
Taqbaylit tezɛef
Tettru almi tendef
Afud ara tt-yessalin yekref
Nekni nerna-yas acennef
Aḍu i d-yewten ad-aγ ycelqef
Tamasalt i d-yenulfan ad-aγ tezlef
S tergin-is i d-aγ teknef
Fell-aγ Ferḥat yeṛwa asḥissef
Yejreḥ wul-is yetlef
Yeggul ur yesgunef
Iswi-s ur tixellef
Timunent ur as-yettanef
Alamma yuli wanay-is ad yerrefrref
Awal γef umedyaz Nurdin Kebbic:
D mmi-s n taddart n Feṛjjun, i yeṭṭafaren tamnaḍt n Luṭa, taγiwant n Ssuq Letnin, agezdu n Bgayet, deg tmurt n Yiqbayliyen. Asmi yella d anelmad, deg tsenawit n umeγras Ceɛban Ʃmer n Uweqas i yebda yessefraw, deg akud-nni i kren-t tmesbaniyin n 2001.
Nurdin am netta am tugget n yilemẓiyen n tmurt, iḥemmel ad isel i uẓawan, d win i d-yekkren s tezlatin n Sliman Ʃazem d Meɛtub Lwennas. Yettwazdeγ s leqdicat n Muḥya, u yessaram ad yeflali yiṭij γef tegduda Taqbaylit.
Nurdin d win yettafen iman-is deg usefru, swayes iferru timsal-is, s wacu i d-yeqqar ayen yettḥussu d wayen yessaram. Γef waya i yura ayen din n yisefra, ama γef tayri, tamurt, tasertit, yerra tijmilin, yessefra daγen γef tmetti d wuguren-is, leɛwayed n yimenza, tilelli d wayen-nniḍen.
Γer tama n tmedyazt Nurdin d ameγnas n taluft taqbaylit, akked umussu adelsan. Ayen i d-irennun tumert d akken iselk-d aṭas n wawalen, inzan, d tmucuha n tgemmi taqbaylit n temnaḍt-is seg nnger. Yura-ten deg yiwet n tezmamt ttwaḥerzen, ahat kra n was ad d-fγen d adlis mi ara yili kra n ttawil.
Awal γef wammud-is n yisefra « Taqbaylit-iw »:
Deg useggas n 2009, Nurdin yebges s tebγest d tayri i yefka i tutlayt d tnekkit, dγa yessuffeγ-d ammud-is amenzu n yisefra, iwemi yefka azwel « Taqbaylit-iw ». Ddan-d deg-s 37 d asefru, γef teγzi n 90 n yisebtaren.
D ammud i wumi iga tazwert mas Naṣir Meğdub i yellan d aselmad, d ameγnas n taluft taqbaylit, d amaru, yessuffeγ-d yiwen n udlis s wazal-is γef umusnaw yettwattun « Reḥmani Sliman ».
Akli Muhubi
SIWEL 261130 Jul 17 UTC