AT VUWADDU (SIWEL) – Ters-d rrehva di taddart. Agraw i texdem tarvaεt n lεaṛc, ulamma llan wid i yugin tikta-nnsen, imi deffir « lqanun nnsen », d tikta tisertiyin yexḍan i tejmaεt n Leqvayel akken i tella d leqṛun aya. Agraw agi yella-d ass n 01/05/2015, ass-en i d-teffeɣ teɣri n ilmeẓyen ar a yemlilen ass n 08/05/2015.
Ass-a, bwḍen kra n imeɣnasen n yiwen ukaγar iḥesγen iman is d amagday, dduran laεnaya n ṭamen, akken ad sxedmen tineslemtaẓri (l’islamisme d l’intégrisme) akken a d-jeγden ɣer tama nnsen kra n wid yeddan di lǧeṛra d wat iččumar, iswi nnsen d lγot nnsen di tefranin n tɣiwanin i d-iteddun. Wid i ten-iḥkmen ttmaεciqen akw d ireγraγen di Zeralda d wanda nniḍen, wigi γɣan ad a sen-fken taɣiwant nneɣ d asfel !
Taluft yecvan tagi d leḥya i lεaṛc nneɣ, teẓẓa lḥir di lɣaci, tuɣal d asentel di tqacuct. Maca, tin i tent-yugaren meṛra, d akken yewweḍ yiwen wervaε ad yerzu ‘er uselway n tɣiwant, s-yisem is d imḍebbar amenzu n tɣiwant n At Vuwaddu, akken ad ttren degs iveddi ‘er tama nnsen, i wakken ad yessiwel i teɣlist (La gendarmerie) akken ad ḥevsen, ass n 08/05/2015, agraw n ilmeẓyen d imezdaɣ n At Vuwaddu ! Arvaε agi, akken ḥala awal nnsen ar a yillin, ḍelven deg uselway n tɣiwant (P/APC) akken ad isiwel a d-cegεen iɣallen n laman (Police, gendarmerie) akken ur ttaǧǧan ara agraw agi n yelmeẓyen i deg ar a d-rren awal mgal leqwanen iveṛraniyen i vɣan a ten-ḥetmen i Lεarc nneɣ.
Aselway n tɣiwant yugi ad ixdem ayen i s-ḍelven imdanen agi i yevɣan ad ṛẓen Taqvaylit akken ad awin tifranin n tɣiwant n 2017 ! Aselway n tɣiwant nneɣ yella mgal takti nnsen, deg m’i sen-d yenna d akken, ilmeẓyen d imezdaɣ sεan azref ula d nutni, ad mlilen, ad mmeslayen, ad msegarwen. Ayagi, d iseɣ i uselway n tɣiwant.
Tagara, nessutur deg ilmeẓyen n At Vuwaddu d iqvayliyen meṛra, akken ad gzun tixidas n udavu i yellan deffir n taluft agi.
S-tdukli d tigzi, afus deg-fus.
At Vuwaddu, ass n 07/05/2015