Taqvaylit

Amuli wis 35 n tmenγiwt n umeγnas-asdawan Kamal Amzal, s ufus n yimeṭṭurfa

TIFERDUD  (SIWEL) — Ass γer was, ayyur γer gma-s, aseggas yeṭṭafar wayeḍ, almi zemmen 35 n yiseggasen γef tmenγiwt n usdawan d umeγnas n tugdut d tnekkit Kamal Amzal, sγur yifasen n leγder n yimeṭṭurfa, ur nessin ara d acu i d tilelli, i yerran tamurt d asif n yidammen.

Kamal Amzal ilul deg as n 13 wayyur n tuver aseggas 1962, d mmi-s n taddart Tiferdud, n At Vu-Yusef. Yettwanγa γef tudert n 20 yiseggasen s umger deg teγremt tasdawant n Ben ɛeknun, di tmurt n lzayer, deg ass n 02 unvir n useggas 1982. Send ad tenγen yicenga n tudert, uznen-as yiwet n tevratt, anda i as-nnan ad tḥevseḍ leqdic-ik neγ ad temteḍ.

Ass-nni mi yettwanγa Kamal, rnan ttwajerḥen 15 n yimdukal-is isdawanen. Ttwawten sγur wat icumar i d-yewwin yid-sen sslaḥ. Nγan-t mi yekfa assenṭeḍ n yiwen n wulγu γef lḥiḍ, anda i yessawal γer yiwen n ugraw n yisdawanen, i wakken ad slalen yiwet n tesqamutt tasdawant ara yesselḥayen lecγal-nsen.

Tawaγit teḍra-d, ilemẓi iruḥen deg usirem ad yekfu leqraya-s, teffeγ-as tirga mxalfa, cleqfent yinegmaren n tmusni. Ma d adavu amharsan am leɛwayed-is yefka afus deg temsalt-a, imi d aqvayli amagday i yettwanγan awer d-tvan tidett γef tmenγiwt-is.

Deg useggas n 1980, mi tetteḍeq tefsut, Kamal yella d anelmad deg tesnawit n Useqqif n Ṭmana (Micli). γas akken d ilemẓi, yella gar yimeɣnasen i yettnaγen γef usenṣev n tutlayt tayemmat akked tugdut, ur yeffir ara, yeqdec tazmert-is.

Deg useggas n 1981, Kamal yewwid agerdas n BAC, yekcem ɣer tesdawit n Ben Ɛeknun, yevda aheyyi deg turagt n tsuqilt s tutlayt taspenyulit. Yerna din i yessen imeɣnasen i yettnaḍaḥen γef tugdut d tnekkit, gar-asen Mestafa Baca, d wiyaḍ.

Kamal Amzal, yura yisem-is s yisekkilen n wureγ deg umezruy n Taqvaylit. Yal aseggas tettuγal-as tejmilt. Llan daγen yinaẓuren i yecnan fell-as gar-asen acennay amḥaddi n tezlit Taqvaylit Uleḥlu. Tiddukla tadelsant n taddart-is teddem isem-is. Ma d Anavaḍ Aqvayli Uɛḍil si tama-s yerra 02 deg unvir, d as aγelnaw n unelmad Aqvayli. Aya-gi d tajmilt i umeγras n tugdut.

Akli Muhubi
SIWEL 021207 Nov 17 UTC

Partager ceci...
Click to comment

You must be logged in to post a comment Login

Leave a Reply

Haut