IDLES – (SIWEL) – Yal aseggas yettnerni yidles d tsekla-nneγ. Mazal wid yesɛan tinzert qedcen, ttarun u sufuγen-d idlisen s teqbaylit-nsen i yugaren yalci deg umaḍal, dγa deg ayyur n tuber yezrin i d-yessufeγ umedyaz ilemẓi Sɛidani Ʃebderaḥim ammud-ines amenzu n tmedyazt s tutlyet tayemmat γer teẓrigin »Asirem » n umaru-aselmad mas Malek Mennic seg Tubirett.
S lebγi-s d leḥmala d wazal i yefka i leqdic-is dγa yebges yessaẓerg-d ammud-ines amenzu deg anda ar ad d-naf 52 n yisefra i yura s Teqbaylit, tugett deg-sen wwin-d awal γef tayri.
Adlis-a ngma-t-nneγ Sɛidani Ʃebderaḥim yebḍa d iḥricen, amur amezwaru d Leqdic n wawal s uzwel ‘‘Aγerbaz n tayri », u sya d afella ad t-id-ḍefren yeḥricen-nniḍen, yalwa s uzwel-ines, yalwa d tadyant-ines.
War tamedyazt Ʃebderaḥim d anelmad deg uḥric n tujjya n yiγersiwen, deg tsedawit n Blida di tmurt n lezzayer, anda iga yakan kra n temliliyin γef udlis-ines amenzu. Iga daγen snat n temliliyin deg taddart-is. Deg tagara nessarem d akken adlis-a d win ar ad d-yawin amaynut i tsekla Taqbaylit. Afud igerzen i kra n wid d tid iqeddcen seg ul. Ad tidir teqbaylit d yeqbayliyen s tdukli, tira, isefra d usnulfu.
SIWEL 051900 DEC 16