Alγu n yimeγnasen MAK-Anavad n Tizi n Berbar d Uweqqas, γef ugdal n usarag Yunes Ʃedli

ALΓU  (SIWEL) — Imeγnasen n temnaḍt n ssaḥel aweqqas d tizi n berbar, am nutni am yimezdaγ n tmurt n yiqbayliyen. Isalli n ugdal n usarag n umazray, amaru Aqbayli Yunes Ʃedli, deg ass n 04 deg meγres yezrin, sγur temsulta tamharsant, i yeγelqen akk  iberdan yettawin γer unammas adelsan n umusnaw Reḥmani Sliman. Hata wulγu n yimeγnasn.

Ass n 04 deg meγres, tamsulta tamharsant teγleq anammas adelsan n Weqqas, γef wudem n yinebgi n lḥerma, i yettwasnen s tektiwin-ines zeddigen. Yunes Ʃedli, amaru, amazray d usdawan, d bab n leɛqel, leɛmer yessawel i ccwal, d mmi-s n laṣel, γef waya ur teğğin ara yimceyɛen n dewla n butcargult, ad yehder γef udlis-ines ‘’Texmam Aqbayli‘’, yewweḍ lḥal anda awal aqbayli, yessag-d leḥkem n bacaγa.

Ipulisiyen i yellan din, yettban ccer deg udmawen-nsen, zemren ad snegren kra win ara d yinin ala i leḥqer d lbaṭel. Ad xedmen ayen iwemi zemren i wakken ad sferḥen cifan-nsen imharsanen, a d tawaγit deg 2017 yettwakkes wawal i uqbayli. Zik mi nettnadi γef tmaziγt, qaren-aγ-d, d acutt tmaziγt-agi-nwen, d llahğa qbayliya, ass-a mi nettnadi γef timunent, qaren-aγ-d kunwi d imaziγen, ulac iqbayliyen,…

37 n yiseggasen i yeɛeddan γef ugdal n usarag n Dda Lmulud, i d-yettmeslayen γef yisefra iqdimen n teqbaylit, deg ass n 10.03.1980. Dγa tekker deg tmurt, i tikelt tamenzut deg umezruy n timunent n lezzayer i d-ikecmen mi teffeγ fransa. Hatan ass-a teṭṭra deg weqqas deg ayyur n meγres, yettwamneɛ texmam aqbayli n Yunes Ʃedli.

Nekkni, s yimeγnasen n MAK-Anavad n Weqqas d Tizi n Berbar, ad n-ini s taγect ɛlayen:

  • Aqlaγ γer tama-k a Dda Yunes Ʃedli, lwaḥi d imṭebren n tidukkla azday.
  • Aqlaγ γer tama n kra n win yeḥwajen lemɛawna.
  • Ala i umnaɛ n leqdic adelsan deg Weqqas, d uxnaq n tdukkliwin.
  • Ala i dewla tamharsant tazdayrit deg tmurt taqbaylit.
  • Ah i timunent n teqbaylit, ara d yerren azal i tarwa-s.
  • Ah i tikli n uγref aqbayli deg 20 yebrir.
  • Ad nini s yiwen n wawal, ulac lbuṭ

AD YIDIR UΓREF AQBAYLI, DEG TIMUNENT D TLELLI D TALWIT

Imeγnasen MAK-Anavad Aweqqas-Tizi n Berbar
Ass n 10.03.2017

SIWEL 132008 Mar 17

Laisser un commentaire