IDLES (SIWEL) — Timetti neγ agdud war taẓuri, ur tufiḍ d acut, anaẓur d lemri n uγref, dγa nekkni s yiqbayliyen d inaẓuren i d yeṭfen ḥerzen tameslayt, gar-asen Zedek Mulud id yefkan aṭas i tezlit taqbaylit, ilul deg At Xelfun-At Dwala, ibda cna deg yiseggasen 80, d ameγnas n tlelli, yettheggi i yibarazen n cna s Teqbaylit deg umaḍal.

Zedek Mulud a d-yezzi i umaḍal:

Γef akken iy-aγ d-weḍḍen yisallen d akken acennay n teqbaylit amḥaddi Zedek Mulud ad yecnu s taγect-is yettbeɛziqen d tezlatin-is yessakan yečuren d lemɛani ad yezzi i wukuẓ n tγemmar n umaḍal ad yecnu deg-sent, seg ayyu n fuṛar 2017 γer win n yennayer 2018, a d-tid yebdu seg fransa (Paris, Lyon, Lille, Marseille), ssin akin ad yecnu deg Montréal d Tmura n Marikan Yedduklen (USA), mi ara d-yekfu ad yekcem ad yecnu deg akalis di tmurt n yiqbayliyen (Tizi wezzu, Bgayet, Tubirett), ad yecnu d aγen deg tmurt n Lmerruk deg Agadir, akk d tmanaγt n tmurt n lezzayer, ad yekfu s yiwen n ubaraz deg Zenith n lpari deg yennayer 2018.

Ma des as n 14 deg yennayer 2017 yettwanced sγur tidukliwin timaziγin n Saint Denis anda ara yecnu ilmend n wansay-nneγ agejdan Yennayer, tameγra-ya ad tid yeḍfer usaru n unaẓur aqbayli Ʃmer Ʃemarni umi yefka azwel ‘’Deg uxxam-nneγ‘’.

Timeγriwin-a deg anda ara yecnu Zedek Mulud d tagnit i wid i ti-ḥemmlen, d wid i ḥemmlen aẓawan d wawal yelhan, meqqar ad walin anaẓur bu tissas id yeqqimen seg tsuta n Dda Lwennas d wid icuban γer γur-sen. Afud iggerzen, ili-t s waṭas ay iqbayliyen, Dda Lmulud yesrayawen.

Awal γef Zedek Mulud:

Zedek Mulud d yiwen n unaẓur i yefkan tazmert d wakud-is i usnerni n Tezlit Taqbaylit ama deg imeslayen neγ d aẓawan, ilul deg as 13 ctember 1960 deg At Xelfun, lɛerc n At Dwala, agezdu n Tizi wezzu deg Tmurt n Yiqbayliyen, yekcem annar n cna deg yiseggasen n 1980, seg yimiren ur yeḥbis, ama deg usufeγ n tesfifin, neγ d timeγriwin deg tsedawiyin d tudrin. Yekred s tuγac n Sliman Ʃazem, Ṭaleb Rabeḥ, Ccix Lḥesnawi, d Ḥnifa Tamedyazt-ines tesɛa ṭṭabeɛ iman-is, yefka-as udem atrar iyas yernan azal, yewwid ass-a isdawanen n yigezda n tutlayt d yidles a d gen tizrawin i yiḍrisen n Zedek Mulud, rnu γer waya d win ixulḍen aṭas n yinaẓuren d yicennayen-nneγ gar-asen Meɛtub Lwennas, Ferḥat Mhenni, Idir, Yusef Abğawi, Ayt Mengellat, Crif Ḥamani d wacu iga tizlit ‘’axeddam‘’ u yedda-d yides amecwar γezzif. Ma d asmi i temlal yid-s tgejdit n cna aqbayli Nwara tγil ahat d awessar yedda deg tudert sebba n cbaḥa n yisefra-as d tezdzg n uẓawan-ines.

Akli Muhubi
SIWEL 261105 DEC 2016