Aṣenfar n umezgun s uγanib Arumani deg Ayt Ʃisa-Aweqqas

AMEZGUN (SIWEL) — Tadukli n Ayt Ʃisa tlul-d deg ayyur n duğember 2006, s ufus n yilemẓiyen yeffuden idles d wansayen n Yiqbayliyen. D Tadukli i yettwasnen s leqdicat-is yemgaraden am cna, amezgun, asfuggel n yennayer, tafsut n 80, tiwiziwin d useḥbiber γef  twenaḍt, tura atnan deg usenfar n lebni n umezgun s talγa n tarumanit.

Aṣenfar n lebni n umezgun s talγa tarumanit neγ s ṣṣenf arumani iwemi i d-fkan tayett yiminigen Iqbayliyen, ladγa wid yettidiren deg tmurt n Kanada, d waṭas n yimeznaz d wat tkubaniyin n yal aḥric da deg tmurt.

Aṣenfar n umezgun yebda deg ayyur n tuber 2016, yegra-d asurrif meqqren, d win ara yawin ugar n 600 n yimdanen. D amenzu i yemmugen s uγanib-nni deg tmurt n Yiqbayliyen.

Ma d wid neγ tid terza temsalt i yessarmen neγ bγan ad kkin, zemren ad fken afus n tallelt, acku yal as n lğemɛa tettili-d twizi. Tzemrem ad kkim s yiγil (physique), neγ ad cegɛem kra n ttawilat yecban abellaḍ, rrmel, neγ d ayen-niḍen.

I usmekti, deg kra n wussan γer deffir Tadukli n Ayt Ʃisa, teṭṭef tadrimt n yiminigen i d-yettwacegɛen seg tmurt n Kanada, ayagi yerna-d afud i yiɛeggalen d yimezdaγ n taddart-a. Snemren s waṭas tigawt-a n twizi d yibeddi n Yiqbayliyen γer usenfar yecban wa, i rran-t tlisa akin tmurt-nsen, imi mazal-iten ttaran-d i tiγri n ugdud yeffuden idles d tlelli deg tmurt.

Tanemmirt i yiminigen, d wat usenfar n umezgun, s leqdic d tdukli kan i tezmer ad teqqim tnekkit taqbaylit s wazalen-is igejdanen, i wakken yal tasuta ara d yas-n, ad taf amezruy n tin yezrin, ad tɛaned ad texdem am nettat neγ ugar.

Levni iteddu akken iwata !

Akli Muhubi
SIWEL 221124 Mar 17

Laisser un commentaire