ASMEKTI (SIWEL) – Ass γer wass, aseggas γer gma-s, almi wweḍen 30 n yiseggasen γef tmenγiwt n usertan, abugaṭu d umeγnas n yizerfan d tlelliyin sumata, Ʃli Msili. Yettili-d usmekti-s yal aseggas, ama di tmurt n Yiqbayliyen neγdeg yinig, s usras n tmeqqunin n yijeğigen d ucɛal n tcemmaɛin, akken daγen i d-yettili wawal fell-as, d yibeddi γer yidis n twacult-is.
Ʃli Msili, ilul deg useggas n 1940, yettwanγa di Lpari ass n 07 yebrir 1987. D mmi-s n Teqbaylit taḥrurt, γas akken mačči deg akal-is i d-yufrar, maca aẓar-is yedda yid-s. Yecfa i ccwami i d-teğğa temharsa tafransist, yennuγ mgal tasertit n udabu azdayri, iḥu-d wid yemmuγbnen, yedda deg tikliwin, d waṭas n tlufa-niḍen ansa i d-yekka.
Ar ass-a ur d-iban wacema γef lmut-is, Fransa ur as tewqiɛ ara akk deg taluft-agi, terra-t amzun d aqesser, maca aṭas n yimdanen mazal ṭṭfen bγan tidet, γef waya yal aseggas tettuγal-as tejmilt ama deg yinig (fransa) neγ da deg tmurt n Yiqbayliyen.
Taluft n tmenγiwt n ubugaṭu Ʃli Msili, tcuba γer tin n Krim Belqasem, Muḥmed Xider, Ameẓyan Mhenni, d wiyaḍ, yal yiwen d tadyant-is. Ttwanγan deg yinig, iwakken ad teshel tufra n tidet γef ugdud.
Ayen i d-yettaran asirem, d akken mazal irgazen d ttlawin i yettnaγen γef tidet d tlelli, γas tiktiwin mgaraden-t maca iswi ahat d win ibanen, d win ara yesdaklen iγallen tsuta γer tayeḍ.
Ar ass-a tidet ur d-tban ara, yal wa s anda i t-yeqqen, yal wa akken i yeshetrif, maca tawacult-is d tin i kemmlen amennuγ-is s tezdeg d leqder. Tajmilt ad tuγal i kra n wid d tid i yewwin abrid n twacult i teddun γer zdat.
Akli Muhubi
SIWEL 251003 Apr 17 UTC