22 n yiseggasen seg asmi tettwanγa tnaẓurt taqvaylit, Lila Ʃmara

ASMEKTI (SIWEL) — Deg tallit-nni n yiseggasen 90, aṭas n yinaẓuren, imeγnasen, imyura, d yineγmasen iqvayliyen i yečča ujenwi d rṣaṣ n yinsenselmen imṭṭurfa. Acku tamuγli-nsen d akken taẓuri tettwagdel u tettwaḥrem sγur yillu (Allah), ma d tira d tγamsa skarayent ccwal deg tmetti.

Zrin wussan, rnan yiseggasen, γef tmenγiwt n tcennayt taqvaylit Lila Ʃmara, s yifassen n leγḍer n yirevraven i d-yesseγlin tugdi deg uzal qayli. Nγan-tt acku tcennu γef wansayen, nγan-t acku d tameṭṭut.

Lila Ʃmara d yiwet seg tlawin tiqvayliyin i yerẓan asalu di tmetti, i iẓẓaren tameṭṭut s yir tamuγli deg akud-nni. Tezga tcennu sya γer da mi ara d-tili tegnitt. Γur-s taγect telha nezzeh i cna.

Tessekles ugar n 15 n tezlatin, d kra n tvidyutin s tutlyt-is tayemmat i tḥemmel ugar yalci. Gar-asent: ay aḍu, tala, tettru tmilla, win ḥemmleγ, urar, lḥenni, …d tiyaḍ. Tcennu γef wansayen n teqvaylit, tayri, lmeḥna, d tlufa-nniḍen.

Deg ayyur n meγres n useggas n 1993, Lila tewwi avrid γer Lpari deg tmurt n fransa, i wakken ad tefk tallelt wa d tili γer yidis n Nna Crifa n Weqvu i yecnan deg tzeqqa n Olympia deg akud-nni.

Lila tettwanγa γef tudert n 40 n yiseggasen, nettat d urgaz-is i wumi ssawalen Lvacir, deg unevdu qessiḥen, n wayyur n γuct n useggas 1995, s teldunin n yicenga n tudert, yerna xenqen-asen.

Wid d tid iran ad slen i tezlatin n tnaẓurt Lila Ʃmara, llant deg uẓeṭṭa anemti n yutub, akken daγ i yella yiwen n usevter s yisem-is di Facebook.

Akli Muhubi
SIWEL 111825 Oct 17 UTC

Laisser un commentaire