ASMEKTI (SIWEL) – Send iḍeli lewhi n 10:30, tawacult Sɛidi, terra tajmilt i mmi-s Akli. I yettwanγan deg ass n 25 deg ayyur n yebrir 2001, deg iγẓer ameqran, agezdu n Bgayet, deg tmurt n Yiqbayliyen. S teldunt i yečča deg uqerruy-is sγur yiğadarmiyen, deg tedyanin n tefsut taberkant.
Akli yella s ukamyu, iteddu ad yawi kra n yisufar, mi yewweḍ γer yiγẓer ameqran, iğadarmiyen ur terḥimen ara, qerṣen fell-as war akukru. Akli Sɛidi, teččur-as deg tudert-is 35 n yiseggasen, akken i d-yewweḍ wakud ad yidir, ssifgen-t wid iγunzan tudert d yijeğigen.
Asmi yemḍel deg tγiwant taqburt n yiγrem n uweqqas, deg ass n 29 yebrir, d igiman n lγaci yeffuden tilelli, i d-yusan ad ilin γer tama n twacult-is, wad ḍefren abrid n umennuγ γef tidet d tlelli.
Deg tejmilt iy-as yuγalen iḍeli, yezwar-d deg awal gma-s n umeγras, i yesnemmren wid i d-yerran i tiγri, yerna yesegza-d tamsalt n tmenγiwt n gma-s Akli. Ssin akin awal yettunefk i umeγnas Lḥusin i yellan d aselway n tenmiregt Mak-anavaḍ n Tizi n berbar, i d-yewwin awal γef yimeγrasen n tefsut tabrkant, d wid akk yeγlin γef tlelli. Yerra daγen tajmilt i Samir Taɛrujit, i yemmuten deg 2013 sebba n waṭṭan i d-yeṭṭef deg akud-nni mi tker di tmurt n yiqbayliyen, imi yettwazdegdeg sγur temsulta tamharsant.
Awal n taggara yettwanefk imass Ʃisani Murad, i yerran tajmilt i umeγras Kamal Ircen, i yuran s yidamen-is TILELLI, ssin akin yerra tajmilt i wakli d warrac akk n tefsut, s kra n yisefra i d-yekkes seg udlis n Mulud At Ceɛban (Furulu), i yura γef umedyaz Si Muḥend U Mḥend.
Deg taggara, wid i d-yerran i tiγri suγen s yiwen n wawal « Nekni s Leqbayel neɛya di lbaṭel, tafsut n walfin tejreḥ ulawen ». u nnan-d ulac smaḥ, ulac tatut skud ur tban ara tidet γef tmenγiwt-nsen.
Akli Muhubi
SIWEL 300135 Apr 17 UTC