IDLES (SIWEL) — Tecbeḥ tutlayt d yidles n tmurt-nneγ yettwaɛeggben aṭas aya, s yimedyazen d yinaẓuren i d-turew, fkan-as azal d wakud, bedden s tenzert d leḥmala i wagla-nsen, wa yurawihin yecna, wayeḍ yessefra, win niḍen iweṣṣa, ger yirgazen-a yefkan azal i tira s Teqbaylit, yella Ḥmed Nekkar.
D amedyaz, d amaru, d ameγnas n teqbaylit, yekki deg waṭas n temliliyin d yisaragen i d-yettilin γef tnekkit-nneγ. Akka tura yesselḥay tiẓrigin "Tamagit" netta akk d umedyaz n Teqbaylit Yeḥya Yanes.
Ḥmed d win yettaken azal ameqqran i tγuri n yidlisen ama s tutlayt-is neγ s tutlayin tiberraniyin i t-yeğğan ad yessuqel ayen din n tmucuha γer tutlayt-nneγ, ara d-yernun tabaγurt d ccbaḥa i teqbaylit. Ass-a ur nezmir ara ad d-nebder tasekla taqbaylit ma ur d-yeddi ara yisem n Ḥmed Nekkar, imi yeṭṭef deg-s amḍiq s ubrid n tezdeg i d-yenjer am win n Belɛid At Ʃli, Racid Ʃellic, Ʃmer Mezdad d wiyaḍ.
Yebda tamedyazt deg yiseggasen-nni n 70, asmi yella d anelmad di tsenawit. Ungal-ines amenzu yeffeγ-d deg useggas n 1999 γer teẓrigin n Yuba wis-sin. Dγa seg yimiren ur yeḥbis, yettaf iman-is di tira. Γas akken yessaẓerg-d ayen din n yidlisen, mazal yettheggi-d amaynut i d-yenna mmi-s, Nayer Nekkar.
Ayen yura yeffeγ-d:
– Yugar ucerrig tafawett, 1999 , ungal
– Gerzzebra d yefḍisen, 2012, ungal
– Adlis n tγuri, yebrir, 2014
– Tajeğğigt n Meγres, 2015, ungal
– Taγaḍt n Mass Seguin, 2015, tullist
– Ruzama d umakwar, 2015, tullist
– Aẓeḍḍa n Tissist, 2016, ungal
– Inebgi n rebbi, 2016, tamacahutt
– Tibḥirt n temhargiwt, 2016, tamacahutt
– Alluca di tmura n tirga, 2016
SIWEL 170003 FEV 17