Culture et identité

Ḥmed Ḥamum, mmi-s n Tqervust yefkan azal i Teqvaylit-is

TAQERVUST (SIWEL) — Aṭas n yinaẓuren d yimyura i d-tefka Tuvirett, qedcen γef Teqvaylit, kecmen leḥvas, mugren s yidmaren-nsen tildunin, llan wid yecnan, wiyaḍ ssefran, γef waya ur yezmir yiwen ad yeffer iṭij s uγerval. Gar waṭas seg wid iqedcen yella uselmad-amaru Ḥmed Ḥamum, yefka-d tazmert-is i lfayda n Teqvaylit-is.

Ḥmed Ḥamum ilul deg tefsut, as n 04 n wayyur n meγres n useggas 1955, di temnaḍt n Tqervust, tawilayt n Tuvirett, deg tmurt n Yiqvayliyen. D aselmad n tutlayt-is, d ameγnas γef tnekkit-is. Rnu γer waya yekker-d deg umussu adelsan, yekki deg xilla n leqdicat.

Yella d aselmad n taɛravt γef teγzi n 18 n yiseggasen, deg uswir amenzu, syin akin iveddel aselmed, yelha-d d uselmed n tutlayt tayemmat, deg uγervaz alemmas n n umeγras Tazaγart Ʃacur. Γur-s azal n sḍis n yiseggasen seg-mi yeffeγ tastaγt.

Mas Ḥmed yefka azal i tsekla, d aya i t-yeğğan ad yessuffeγ, kraḍ n yidlisen n tmucuha i d-yeffγen s wunuγen, yerna s tedrimt-is, d netta i ten yezzuzren deg temkerḍiyin n tmurt n Yiqvayliyen (Vgayet, Tuvirett, Tizi Wezzu).

Ḥmed Ḥamum yefka azal d ameqqran i tsuqilt seg tutlayin tiverraniyen γer teqvaylit, d aya i t-yezzuγren ad yessuqel tullist n unaggal afransis yettwasnen deg unnar n tsekla deg umaḍal “Guy de Maupassant”.

Ugar aya mas Ḥamum d ameγnas n taluft taqvaylit, d vu-tektiwin yelhan, yeqqar-d aqli da mi ara d yili kra n leqdic, werğin yessɛuẓeg i tiγri n wayetma-s. ma d idlisen i d-yessaẓreg ur γlayit ara maḍi, swan ḥala 50 n yidinaren.

Tazwert n udlis amenzu iga-tt uduktur n tsekla Taqvaylit deg akud-nni mas Kamal Buɛemmara, ma d adlis wis-sin sγur uselmad n tesga n vgayet mas Mulud Qurdac. Ma d adlis-ines “Aḥeggan n Wakli” iga-as tasuqilt seg Teqvaylit γer tefransist mas Ḥafiḍ Bessɛudi.

Idlisen i d-yessuffeγ :
– Aḥeggan n Wakli, 2005
– Tamacahut n temqerqert, 2005
– Lekdeb imzenneq, 2007
– Amenṭri,  d tasuqilt n « Le Vagabond »  n Guy de Maupassant, 2009
– Ameɣnas-nni, 2014

Akli Muhubi
SIWEL 102147 Nov 17 UTC

Partager ceci...
Click to comment

You must be logged in to post a comment Login

Leave a Reply

Haut