Ḥamid Hemmiğ, Acennay n Teqbaylit i d-tefka taddart n Iɣil wis deg At Buɛisi

TIZLIT (SIWEL) — Ulac tiɣmert deg tmurt n Yiqbayliyen ud nefka xerṣum yiwen n ucennay. Ḥamid Hemmiğ d yiwen gar-asen i d-tefka taddart n Iɣil wis i yeṭṭafaren lɛerc n At Buɛisi, deg yidurar n tγiwant n Tizi n Berbar,tawinast n Uwqas, agezdu n Bgayet.

Hemmiğ Ḥamid yewsa-d ɣer tudert deg ass n 10 deg ayyur n yunyu n useggas n 1974. Yebda cna deg yiseggasen n 1990, deg akud-nni icennu deg tmeɣriwin n urcal (zwaj) neɣ deg tegratin mi ara ad ṭwin (ad ksen). Am netta am wid n tallit-nni.

Deg useggas n 1994, yebges s wul-is d tebγest i yesɛa, yesekles tasfift tamenzut s uzwel « Tiziri ». Yettuγaḍ lḥal mliḥ imi tasfift-nni tettwasekles kan, maca ur d tfiγ ara ad seslen yimdanen. Sebba ahat lawan-nni mmi-s n udrar ur-as yeshil ara ad yessekles, ad yesazṛeg, wa d yezenz tasfift-is.

Sḍis n yiseggasen (2000) yeqqel-d s tesfift tis snat, ifka-yas azwel « la cennuɣ kem » i d-yeffɣen γer teẓrigin “allaɣ music”, yessekles deg-s ṭam n tezlatin. Imir-nni dγa yewwi abrid γer lpari mleqwas. Kra yiseggasen iban-d deg tiliẓri n beur.tv deg tedwilt n mas Nur n At Ʃmara fell-as talwit.

Yeqqim ayen din n yiseggasen ur d-yessufeγ kra, imi tazmert-is d tin yenṭren s waṭas. Almi d aseggas n 2010 i d-yusuffeγ aḍebsi wis kraḍ γer tezṛigin Talwit n Bgayet. Ma deg useggas-agi n 2017, yerna-d aḍebsi deg i d-ddan-t 13 n tezlatin i d-yewwin γef waṭas n yisental, gar-asen : tayri, tasertit, tamurt, d wayen-niḍen. Aḍebsi-ya yefka-yas azwel « Amrar ».

Ma d aɣanib n Ḥamid, d win imalen γer ceɛbi d lfulklur, rnu ɣer waya yesmuzgut i waṭas n tgejdiyin n cna n Teqbaylit, gar-asen Meɛtub Lwennas, Sliman Ʃazem, Ccix Lḥesnwi (Muḥmed Xelwat), Karim Tizuyar, Luṣif, d waṭas-niḍen n yicennayen i yuran isemawen-nsen s yisekkilen n wureγ deg unnar n tezlit Taqbaylit.

Ḥamid Hemmiğ d win yecnan deg aṭas n temnaḍin n tmurt n Yiqbayliyen, amedya: deg tγiwant Ferɛun, tamdint d tnezduγin n tsedawiyin n Bgayet, Awqas, d wanda-niḍen. Yecna deg inig deg kra n tzeqqiwin yettwasnen di Fransa.

Akli.Muhubi
SIWEL 212311 Jun 17 UTC

Partager ceci...