Ḥsen Budya, itri n tezlit taqvaylit i d-fkan Iwaqquren

IWAQUREN  (SIWEL) — Ulac tiγmert deg tmurt n Yiqvayliyen ur d-nefka xerṣum yiwen ucennay neγ sin, ad icebbeḥ isem n temnaḍt-is, ad tzuxxun yes-s yimezdaγ n taddart-i. Ttin i ten-ttyifen cennun s teqvaylit, ur ttun ara tinekkit. Gar-asen Ḥsen Budya i d-tefka taddart n Iwaquren.

Ilul deg tefsut, ass n 17 n wayyur n meγres 1959, deg taddart n Iwaquren, deg Iimceddalen. Vava-s sawalen-as Ḥmed, yettwanγa deg useggas n 1961 deg Udekar. Yenγa-t ucengu amharsan afransis, yefka tudert-is d asfel i wakken ad idiren wiyaḍ di tlelli. Yeğğa-d tameṭṭut-is d Ḥsen γef tudert n sin iseggasen. Syin akin wwint xwal-is, yegma-d gar-asen refdent ur teğğin ara, almi i yessen tudert, yuγal d argaz.

Ḥsen d win iḥemmlen aẓawan segmi yella d aleqqaq. Yessal s waṭas i yicenayen iqvayliyen i as yezwaren γer uvrid-agi. Gar-asen Sliman Ʃazem, Ʃellawa Zerruqi, Crif Xeddam, Farid Ʃli, Muḥend Saɛid Uvelɛid, Lḥag Elɛenqa d wiyaḍ. Ma d aγaniv ixdem deg-sen kra kra i merra : yeṭṭef-d cceɛbi, atrar, fulekluṛ, d wayen-nniḍen.

Yessekles tasfift-is tamenzut deg useggas n 1992 γer tezṛigin Le Solaitaire n Uγvalu n Tuviret, anda i yessekles sḍis (06) n tezlatin s yisental yemgaraden. Dγa seg imiren ur yeḥvis. Yerna Ḥsen yecna γef xilla n yisental, gar-asen: tayri, tamurt, tugdut, tameṭṭut, lḥif d wayen-nniḍen.

Yekki deg xilla n temliliyin d tfaskiwin i d-yettilin sya γer da di tmurt. Yexdem aṭas n yivarazen d tmeγriwin, yettar-ad i tiγri n tiɛadat yecvan: 20 yevrir, yennayer, 20 γuct, as agraγlan n ugrud, akk d tfaskiwin n tmedyazt …

Aṭas n tikkal netta yeqqar-d: “kra n win i d-yerzan ad yenced, ttaraγ-d i tiγri, wejdeγ i kra n tmeγra n win ara d-yessawlen war akukru”.
Akken daγ i yesḥassef aṭas γef tsertit n udavu amharsan deg yiseggasen 80-90 γef lvaṭel i d-yesseγli mgal imeγnasen i yettnaγan γef usenṣev tutlayt d yidles amaziγ deg akud-nni, dγa yenna deg yiwet n tezlit n tesfift-is tamenzut i d-yessuffeγ deg useggas 1992:

Tafat fell-aneγ tecɛel
Avrid n tlelli yenjer
Di tmurt ad nekkes lvaṭel
Ma nemlal akk s leḥrar
Afus deg fus ad ndukkel
Tamaziγt ad tt-nγer.

Akli Muhubi
SIWEL 261846 Oct 17 UTC

Laisser un commentaire