IDLES (SIWEL) – Tamedyazt teṭṭef adeg meqqren deg tmetti Taqbaylit, ulac tiγmert ur-d nefki xerṣum yiwen n uheddad n wawal, yal wa deg-sen γer wanda imal, yal yiwen γef acu yessefraw. Wa d amecṭuḥ, wayeḍ d awessar, tihin d tilemẓit, tayeḍ-nin d tanelmadt.
Yusef Haruni, d yiwen n yilemẓi i d-yusan γer tudert deg ass n 26 deg yulyu aseggas n 1994, deg tama iwemi sawalen At Yemmel, deg tγiwant n Tmezrit, aγir n Bgayet. Mi yessaweḍ 16 n yiseggasen yebda yettaru idṛisen bujadi, akken yufa, almi d aseggase n 2015 s tebγest yessaẓreg-d ammud-ines amezwaru iwemi yefka azwel ‘’ASIREM‘’.
D ammud deg-i i d-ddan 32 d asefru s teqbaylit, iwemi tga tazwert tselmadt Kinzi.K. Yusef yessefraw γef tmurt, timetti, tayri, yerra tijmilin i wid yeẓra uklalen.
Akka tura ata yetthegi ammud n tmucuha akked uḍebsi n yisefra s tutlayt-ines tayemmat. Yekki deg aṭas n tfaskiwin d temliliyin, seg tmurt n yiqbayliyen, γer tin n yicawiyen, imuhaγ d yimzabiyen,…
Ammud-agi Asirem, yettnuz deg Bgayet, deg tnedlist n Muḥend Uarun n uqbu, deg tizi wezzu, d wanda niḍen.
Akli Muhubi
SIWEL 272107 Mar 17