TADIWENNIT (SIWEL) – Γilas Ʃebdus, d yiwen n yilemẓi, i d-fkan yidurar n Ukefadu, seg taddart n Tewrirt, d anaẓur yessdukklen tamedyazt d cna, yura ddeqs n yimagraden γef yidles d tutlayt taqbaylit, yesaẓreg-d yakan aḍebsi n cna, netta d gma-s, u atnan theggin wis sin akked wammud n yisefra.
Deg tazwara ini-d i yimeɣriyen anwa i d Γilas Ɛebdus ?
Γilas Ʃebdus d yiwen n yilemẓi, deg tudert-is 20 n yiseggasen. Yedder deg taddart n tewrirt. Taγiwant n Ukefadu, lɛerc n At Mensur. d aneγmas, d amedyaz, d anaẓur, d aselway n useqqamu n yilemeẓiyen n ukefadu, d aqeddac γef yidles aqbayli, d tferka n ugafa s umata.
Meslay-d ɣef leqdic-ik i uḥraz n Teqbaylit ?
Leqdicat-inu yellan deg useqqamu n yilemẓiyen, nɛereḍ-d aṭas tdukliwin n tmura n lberrani, amedya seg kanada, fransa, lispan,… akked yimyura, ineγmasen d yimeγnasen, anda xedmen isaragen d usileγ i yilemẓiyen i wakken ad fazen deg umecwar n tmusni.
Ttekkiγ di leqdicat i d-yettilin dagi di tmurt n leqbayel, ama d tamedyazt, cna, tira, d yimagraden d wayen-niḍen, γas ini-as deg yal leqdic ẓar-γh ad agem-γ tamusni ad tid ḥiwceγ γer walaγ, wa ad tnef-k i wiyaḍ ad sfaydin. Nekk ḥemmleγ aẓar-iw, d wansayen n tmurt-iw, idles d tutlayt n yimawlan-iw. Fell-as ad naγ-γ alma mmut-γ.
Tekkiḍ deg terbaɛt n cna « Itran », awal-ik fella-s ?
Ih yella waya, d tidet ufrar-γ-d deg yiwet n terbaɛt n cna n uγanib atrar nekk akked gma Ʃezedin Ʃebdus, nlul-d d akniwen. Nesɛa aḍebsi i d-yeffγen γer ssuq deg useggas 2014. Nettekki deg tfaskiwin i d-yettilin deg tmurt n leqbayel. Nettwanc-d γer umaṭṭaf n Sumam, akka tura nesɛa tinnubga γer tmurt n fransa, anda tella tfaska n uẓawan n teqbaylit tagraγlant, nettwaɛreḍ daγen γer tmurt n kanada, ad necnu di tfaska n wayyur amaziγ, anda tuγalent tejmilin i yinaẓuren iqbayliyen. Tura aqlaγ deg uheggi n udebsi wis sin, deg ‘’ustiyu Irat’’ deg Tizi wezzu. Nessaram ad yeffeγ deg taggara n useggas n 2017.
D acu d isenfaren i d-tettheyiḍ ɣer zdat ?
Aqli-yi nekk d gma Ʃezdin deg usewjed n wammud n yisefra, ara yesɛun 30 n yisefra s teqbaylit. Γur-neγ daγen asileγ, deg tmurt n berrani, s useqqamu n yilemẓiyen, ara nruḥ γer din i wakken ad nekki. Aqlaγ akka tura deg uheggi n temlilit i tririyin n warrazen n temsizelt tullisin n Belɛid At Ʃli, akked tsbeddit takanadit tiregwa. Aqlaγ la nettkemmil deg temliliyin n lqahwa n tsekla.
Kečč yellan d ilemẓi, amek i tettwaliḍ liḥala n tmurt ?
Liḥala n tmurt d ayen qerriḥen, imi adabu yerra tilas i tmurt n leqbayel, yeɛfes tilelli-ines, yegzem asirem i yidles d tutlayt-nneγ. Yerra-d ablaḍ γef ugdud aqbayli. Dacu kan, tamurt n leqbayel d tin yesɛan tazmert, tettkel γef yiman-is, teččur d asirem, imi mazal llan-t tdukliwin d yirgazen yettnaγen γef yidles d tnekkit, i wakken ad d-idiren i lebda.
D acu d izen-ik i yilemẓiyen iyak yecban ?
Ad d-asen iniγ i yilemẓiyen, d akken kuwni d tafat, d usirem d ddwa n ḥellu i tmurt, akken ad seḥbibren γef wansayen, d uẓar-nsen akked umezruy, d wayen i d-icuden γer teqbaylit. Acku d taqbaylit i d cci-nneγ n tmusni. Yewwid fell-asen, ad ḍefren abrid i d-ğğan lejdud-nneγ seg tsuta γer tayeḍ. Acku akken neqqar deg yiwen yinzi: « Win ur neẓri ansi i d-yekka, ur iban s anda i leḥḥu. ».
Ahat yella kra ɣef acu i tebɣiḍ ad d-theḍreḍ ur k-id-steqsaɣ ?
Isteqsiyen-inek lhan maḍi, imi dayen i ttwaliγ i d-nniγ, maca akken qqaren mačči d yiwet, ad tid bedreḍ, ama d nekki, neγ d kečč-ini. Yelha nezzeh, sureft-iyi ma yella wanda i cḍeγ awellih-iw.
Awal n tagara s wacu ara nfak tadiwennit-a…
Awal-iw aneggaru, ada k-iniγ, tanemmirt aṭas ay Akli, γef yisteqsiyen-inek, imi dayen igerzen, imeslayen-inek cban iɛeqqayen n tayri d iziḍanen. Ssaram-γ taγuri igerzen yimeγriyen. Ssaram-γ taqbaylit ad yali ccan-is, ad tufrar gar tiyaḍa. Akken ad yidir uẓar-nneγ deg umezruy n yal tasuta. Tanemmirt.
Yesteqsat Muhubi Akli
SIWEL 141319 Mar 17