TAQBAYLIT, GAR TSEKLA D TUSSNA

25/08/2015 - 19:11

Tazwert

Yeqqar-as Lounis Ait Menguellet deg yiwet seg tezlatin-is : “Zik, wa ihedder-itt i wayeḍ, ass-a deg lkaɣeḍ, ad tt-id-afen yineggura”. D tidet, acku ma yella “Taqbaylit” tedder acḥal n leqrun deg timawit seg yiles ɣer tmeẓẓuɣt, seg tsuta ɣer tayeḍ, ass-a, tekcem amaḍal nniḍen, amaḍal n tira i as-yefkan tudert n lebda akken ad teqqim tewcem deg zmamat d yidlisen i d-itteffɣen akka, yal ass.
Ass-a taqbaylit twala tafat, llan yimyura, tteffɣen-d yidlisen, ihi anda yuweḍ ufares s tutlayt-a? Anwa-ten yinurar ideg tekcem ass-a? D acu i ilaqen akken ad tennerni ugar?


1. Idlisen imezwura :



Leqdic d unadi deg tutlayt taqbaylit ur yelli ara d amaynut, imi yebda yakan deg tallit tamharsant Tafransist, ayen i d-issebganen s ttbut lwelha n kra n yimusnawen ɣer tutlayt-nneɣ tayemmat, d idlisen imezwura i d-yeffɣen s teqbaylit deg taggara n tasut tis 19, gar-asen :

- Essai de grammaire kabyle » n Adolphe Hanoteau (1858).

- Manuel de langue kabyle : n René Basset (1887).

- Cours de langue kabyle : n Belkacem Ben Sedira(1887).

- Première année de langue kabyle : n S. A. Boulifa (1887).

Idlisen-a xas ttwarun s tefransist, maca wwin-d ɣef tutlayt Taqbaylit, yerna sɛan iswi asnalmudan, imi d wi i d idlisen imezwura i yettwasmersen deg uselmed n teqbaylit deg useggas n 1880/1885 d asawen.

2. Annar n Tsekla :



Segmi yura Belaid At Ali ungal amezwaru s teqbaylit “Lwali n udrar” i d-ssuffɣen yimrabḍen irumiyen J.M.Dallet d J.L.Degzelle deg useggas n 1963, yenǧer ubrid i ufares aseklan s teqbaylit.

Maca, almi d iseggasen n 80 i bdan ttbinin-d yimyura imezwura ara ineǧren abrid i tewsit-a n wungal. Deg tallit-nni ffɣen-d kraḍ wungalen : Asfel (1981), Faffa (1986) i yura Rachid Aliche, Askuti (1983) i yura Said Sadi (1983). Syin akkin, d Amar Mezdad i d-yessuffɣen ungal-ines amezwaru iwumi isemma “Iḍ d wass” deg useggas n 1990.

Seg yimir d asawen, annar n ufares aseklan s teqbaylit simal yeǧǧuǧug irennu, banen-d yimyura nniḍen, yecban : Salem Zenia, Meziane Ou Mouh, Brahim Tazaghart, Malek Houd, Mourad Zimou Hocine Louni, Mehenni Khalifi d wiyaḍ.

D ungalen neɣ d tullisin, d idlisen i d-yewwin amaynut deg unnar aseklan n Teqbaylit, ama deg uɣanib ama deg usentel, ama deg tugniwin, ahat d ayen ara yeǧǧen ad d-lalen ar sdat yimussuten iseklanen n Teqbaylit am wakken i llan akk deg tsekliwin n umaḍal.

3. Annar n Tsuqilt :



Taqbaylit ur teqqim ara kan deg tira n wungalen d tullisin i d-snulfan yimawlan-nsent srid s teqbaylit, maca llan wungalen n tsekla tagreɣlant i d-yettwasuqlen ɣer teqbaylit. Gar wungalen-a, ad d-nebder :

- Arranku (l’alchimiste) n Paulo Coelho sɣur inelmaden n lmajister n Tesdawit n Tizi Wezzu.

- Leɛzib n yiɣersiwen ( The animals farm) n George Orwell, i d-yessuqel Habibe Llah Mansouri.

- Tuɣalin n uqcic ijaḥen (Le retour de l’enfant prodige) n André Gide, i d-yessuqel Kamal Bouamara.

- Nnbi (Le prophete) n Gibran Khalil Gibran, i d-yessuqel Hocine Louni.



4. Annar ussnan d yimawalen uzzigen :



Tutlayt i tt-irefden d amawal. Ma llan yimawalen, ad tili tira, ad ilint tsuqilin, ad yili usnulfu aseklan d wussnan. Ihi ma nuɣal-d ɣer tutlayt Taqbaylit, ad naf dakken aṭas n yimawalen i yellan: Amawal n J.M.Dallet, amawal n Tmaziɣt tatrart n Mouloud Mammeri d wiyaḍ. Maca ayen i yessefraḥen ugar, d imawalen ussnanen uzzigen i yettwaxedmen deg yiseggasen n 80 ar ass-a, gar-asen ad nebder :

- Amawal n tusnakt, tasɣunt Tafsut, uṭ. 4, Tizi Wezzu, 1984.

- Amawal n tfizikt tatrart n Dahman Mazed, Tiẓrigin asafu, 2003.

- Amawal n tussniwin n wakal n Yidir Ahmed Zayed, HCA, 2004.

- Amawal n tsenselkimt n Samia Saad Bouzefrane, 2004.

- Amawal amecṭuḥ n tussniwin n ugama n Omar Kerdja, HCA-Anep, 2006.

- Iɣsan s Teqbaylit, (Vocabulaire kabyle de l’ostéologie et de l’orthopédie) n Mohamed Zakaria Benramdane, HCA, 2010.

- Dictionnaire d’électrotechnique, n Mohand Mahrazi, HCA, 2011.

Imi llan yimawalen-a, ihi menwala deg-neɣ yezmer ad yaru imagraden neɣ tizrawin ɣef yisental ussnanen, am tussnakt, tussna n ugama, tussna n wakal ... ilaq kan ad nekcem s annar n tira, yerna ayen i isehlen tura, d tira n wayen yerzan tussniwin talsanin d tmettiyin (S.H.S) am tesnimant, tasnamettit, tasnalest, azref, tadamsa, tussniwin tisertanin ...


Taggrayt

S wakka, ad nellez dakken tutlayt Taqbaylit d tutlayt am tutlayin-nniḍen yellan deg umaḍal, tezmer i yiman-is, tezmer i tsekla akken i tezmer i tussna, maca Tutlayt/Idles, i t-ixeddmen d imawlan-is, ihi ma nebɣa Taqbaylit ad taweḍ anda akken tuklal ad taweḍ, ilaq kan ad d-nekcem s annar n tira, leqdic d useqdec n tutlayt akken ad d-tefk akk ayen tesɛa, s wakka ad nessiweḍ ad nesɛu idlisen ussnanen n Teqbaylit, yerna ad nuɣal ula deg uɣerbaz ad nesselmad mačči kan Taqbaylit maca ad nesselmad tangiwin nniḍen s Teqbaylit. D wa i d-asirem-nneɣ, d asirem n Uwanek Aqbayli n uzekka.

Larbi YAHIOUN,
Aselmad n Teqbaylit.



Kabylie | Afrique du nord | Politique | International | Sport | Culture | Economie / Finances | Sciences Tech



Recherche